पुणे : कोरोना (Corona) संकटात शेतमाल बाजारपेठ (Market) विस्कळित झाल्यामुळे शेतमालाचे दर पडले होते. कोरोना आणि शेतमालाचे कोसळलेले दर अशा दुहेरी संकटात अडकलेल्या शेतकऱ्यांना पणन मंडळाच्या शेतमाल तारण कर्ज योजनेने काही प्रमाणात तारले. ऑक्टोबर २०२१ ते मार्च २०२२ या खरीप हंगामात (Kharif Season) ७७ बाजार समित्यांमधून ४ हजार ४४३ शेतकऱ्यांनी सुमारे ५२ कोटींचे शेतमाल तारण कर्ज (Loan) घेतल्याची माहिती राज्य कृषी पणन मंडळाचे कार्यकारी संचालक सुनील पवार यांनी दिली.

राज्य कृषी पणन मंडळाद्वारे १९९० पासून शेतमाल तारण कर्ज योजना विविध बाजार समित्यांमधून राबविण्यात येत आहे. या योजनेद्वारे शेतमालाच्या किमतीच्या ७५ टक्के रक्कम शेतकऱ्यांना सहा महिन्यांपर्यंत सहा टक्के व्याजाने कर्ज स्वरूपात दिली जाते. याचा लाभ अन्नधान्य उत्पादक शेतकरी (Farmer Producer) घेत आहेत.
या योजनेअंतर्गत तूर, मूग, उडीद, सोयाबीन, सूर्यफूल, हरभरा, भात, करडई, ज्वारी, बाजरी, मका, घेवडा, काजू बी, बेदाणा, सुपारी, हळद (Tur, green gram, udi, soybean, sunflower, gram, rice, safflower, sorghum, bazaar, maize, ghewda, cashew nuts, raisins, betel nut, turmeric) आदींचा समावेश आहे. या योजनेअंतर्गत व्याजावरील ३ टक्के व्याज सवलत पणन मंडळाद्वारे बाजार समित्यांना दिली जाते. तसेच एखाद्या बाजार समितीकडे स्वनिधी नसेल तर अशा बाजार समित्यांना पणन मंडळाद्वारे ५ लाखांचा अग्रिम दिला जातो. असेही पवार यांनी सांगितले.