बेल्हे, ता. जुन्नर ः येथील चार महिन्यांपासून लम्पी स्कीन (Lumpy Skin) आजाराच्या पार्श्वभूमीवर बंद असलेला सोमवारचा जनावरांचा आठवडे बैल बाजार (Livestock Market) सोमवारपासून (ता. २) पुन्हा पूर्ववत सुरू झाला असल्याची माहिती जुन्नर बाजार समितीचे माजी संचालक व म्हशींचे व्यापारी संजय सांखला यांनी केली आहे.

बेल्हे येथे दर सोमवारी जुन्नर कृषी उत्पन्न बाजार समितीच्या उपबाजार आवारात जनावरांचा प्रसिद्ध आठवडे बैल बाजार भरतो. तो लम्पी स्कीनच्या पार्श्वभूमीवर बंद होता. मात्र शेळ्या-मेंढ्यांचा बाजार सुरळीतपणे सुरू होता.

बैल बाजार सुरू झाल्याने शेतकरी वर्ग व व्यापारी वर्गातून समाधान व्यक्त होत आहे. यासोबत म्हशींचा बाजार पुन्हा सुरू झाल्याने दूध उत्पादक शेतकऱ्यांची म्हैस खरेदीची गैरसोय दूर होणार आहे.

जुन्नर तालुक्यात बेल्हे येथे म्हशींचा हा एकमेव बाजार आहे. याठिकाणी म्हशींच्या खरेदी-विक्रीसाठी शेतकरी येत असतात. म्हशीसाठी स्वतंत्र जागा नसल्याने संबंधितांची गैरसोय होते. बेल्ह्यात म्हशींच्या बाजारासाठी स्वतंत्र जागा उपलब्ध करावी, अशी मागणी सांखला यांनी केली आहे.