Satara News : लसीकरणामुळे राज्यभर थैमान घातलेला ‘लम्पी स्कीन’ जिल्ह्यात नियंत्रणात आला आहे. अजूनही या लम्पी स्कीनचे एकही जनावर बाधित झालेले नसल्याची माहिती पशुसंवर्धन उपायुक्त विनोद पवार यांनी दिली आहे.

जिल्ह्यात मागील वर्षी जुलै-ऑगस्टदरम्यान अनेक गावागावांत जनावरे लम्पी स्कीन या आजाराने बाधित झाली होती.

या आजाराने अनेक जनावरांचा मृत्यू झाला होता. या रोग नियंत्रणासाठी शासनाने लम्पी स्कीनसाठी लसीकरणाची मोहीम गावोगावी राबविल्याने साथीवर नियंत्रण आले. पाऊस सुरू झाल्याननंतर राज्यात काही ठिकाणी लम्पीचा प्रादुर्भाव दिसून येऊ लागला असला, तरी अद्याप जिल्ह्यात जनावरांमध्ये लम्पी स्कीन या आजाराचा प्रादुर्भाव कुठेही झालेला नसल्याची माहिती श्री. पवार यांनी सांगितले.

जिल्ह्यात तीन लाख ५२ हजारांवर ४३६ जनावरे असून, तीन लाख ५२ हजार लसी उपलब्ध झालेल्या आहेत. त्यापैकी एक लाख ७६ हजार जनावरांचे लसीकरण पूर्ण झाले आहे.

लसीकरणाची मोहीम सर्वत्र सुरू असून, मागणीप्रमाणे लसींचा पुरवठा केला जात आहे. रोगाविषयी जनजागृत्ती व लसीकरणाचे कामे सध्या वेगात सुरू आहे.