Akola News : स्थानिक म्हैसपूर येथील आदर्श गोसेवा प्रकल्पात विविध सामाजिक संस्थांच्या सहकार्यातून निःशुल्क पशुरोग निदान व उपचार शिबिर घेण्यात आले. या साठी महाराष्ट्र पशू व मत्स्य विज्ञान विद्यापीठ व पशुसंवर्धन विभागानेही मदत केली.

महाराष्ट्र गोसेवा आयोगाचे अध्यक्ष शेखर मुंदडा, ‘माफसू’चे कुलगुरू डॉ. नितीन पाटील, आदिजीन युवक चॅरिटेबल ट्रस्टचे संस्थापक अध्यक्ष जयेश जरीवाला, आदर्श गोसेवा प्रकल्पाचे अध्यक्ष सुभाष जैन, ‘माफसू’चे शिक्षण संचालक डॉ. शिरीष उपाध्ये, अकोला येथील पशुवैद्यकीय महाविद्यालयाचे सहयोगी अधिष्ठाता डॉ. चैतन्य पावशे, जिल्हा पशुसंवर्धन उपायुक्त डॉ. जगदीश बुकतरे, डॉ. नरेंद्र अरबट, ॲड. मोतीसिंह मोहता उपस्थित होते.

शिबिरामध्ये २३२३ लहान मोठ्या पशूंची चिकित्सा, लसीकरण, शस्त्रक्रिया, नसबंदी, फॅक्चर, वंधत्वासंबंधी निवारण करण्यात आले. यात ९२ जनावरांवर मोठी शस्त्रक्रिया झाली. तसेच विविध उपचार व औषधोपचार करण्यात आले. शिबिरात सहभागी झालेल्या ५०० पशुपालकांना जंत निर्मूलन औषध, चाटण विटा व उत्कृष्ट पशुखाद्य, क्षार मिश्रणाचे वितरण करण्यात आले.

आदिजीन युवक चॅरिटेबल ट्रस्ट (मुंबई) आणि मानव सेवा व अबोल जीवन मैत्री चॅरिटेबल ट्रस्ट (मुंबई), श्रीमती मंजुदेवी मांगीलालजी चौहान (भिनमाल), श्रीमती पवनबाई हस्तिमल राजावत (मिरा स्टील एलएलपी) खुडाला यांच्या आर्थिक सहाय्याने तसेच आदर्श गोसेवा आणि संशोधन प्रकल्प (म्हैसपूर),

महाराष्ट्र पशू व मत्स्य विज्ञान विद्यापीठ (नागपूर) व पशू संवर्धन विभागातर्फे हा कार्यक्रम झाला. आदर्श गोसेवा संस्थेचे सचिव विवेक बिडवई, डॉ. कुलदीप देशपांडे, महाराष्ट्र गोसेवा आयोगाचे सदस्य सुनील सूर्यवंशी आदींनी पुढाकार घेतला.