Mumbai News : पशुसंवर्धन व दुग्धविकास विभागामार्फत राबविण्यात येणाऱ्या योजना शेतकरी, पशुपालकांपर्यंत पोहोचविण्यासाठी पशुसंवर्धन व दुग्ध व्यवसाय विकास विभागाने प्रचार आणि प्रसिद्धीसाठी ४ कोटी ९२ लाख रुपयांच्या आराखड्यास मान्यता दिली आहे.

आगामी विधानसभा निवडणुकीच्या पार्श्वभूमीवर राज्य सरकारने २७० कोटी रुपयांचा आराखडा प्रचार आणि पसिद्धीसाठी मंजूर केला आहे. तर कृषी विभागाने १४ कोटी रुपयांच्या आराखड्यास मागील आठवड्यात मान्यता दिली आहे. आता पाठोपाठ पशुसंवर्धन विभागही प्रचार आणि प्रसिद्धीत स्वतःला झोकून देणार आहे.

पशुसंवर्धन विभागाच्या वतीने राबविण्यात येणाऱ्या विविध योजना शेतकरी आणि पशुपालकांपर्यंत पोहोचविण्यासाठी पशुसंवर्धन आयुक्तांमार्फत २० जून रोजी ४ कोटी ९५ लाख ९० हजार रुपयांच्या जाहिरात आराखड्याचा प्रस्ताव दाखल केला होता.

त्यानुसार माहिती व जनसंपर्क महासंचालनालयाने यंदाच्या आर्थिक वर्षासाठी ३ कोटी ९२ लाख, ६१ हजार रुपयांच्या जाहिरात माध्यम आराखड्यास मान्यता दिली आहे. त्यानुसार आता दूरदर्शन, मराठी वृत्तवाहिन्या, आकाशवाणी, समाजमाध्यमे, खासगी होर्डिंग आदींच्या माध्यमातून जाहिराती करण्यात येणार आहेत.

वर्षाचा निधी निवडणुकीआधीच खर्च

विविध विभागांच्या वर्षभराच्या प्रसिद्धीसाठी ठराविक निधीची तरतूद केलेली असते. वर्षभरात हा निधी खर्च व्हावा, असे अपेक्षित असते. मात्र आगामी विधानसभा निवडणुकीआधी सर्व पैसे खर्च करण्याकडे विभागांनी सपाटा लावला आहे.

कृषी विभागाला १५ कोटी रुपयांचा निधी मंजूर होता. त्यापैकी १४ कोटींच्या आराखड्याला मान्यता दिली आहे. तर पशुसंवर्धन विभागाच्या ४ कोटी ९५ लाखांपैकी ४ कोटी ९२ लाख रुपयांच्या आराखड्यास मान्यता दिली आहे.