नांदेड : नांदेड जिल्ह्यात लम्पी (Lumpy Skin) बाधित पशुधनाची (Livestock) संख्या १७१ झाली आहे. जिल्हा प्रशासनातर्फे लसीकरणावर (Vaccination) अधिक भर दिला आहे. गुरुवारी (ता. २९) जिल्हाभर लसीकरणावर नियोजनबद्ध भर देऊन ३१ हजार जनावरांचे लसीकरण करण्यात आले. आजवर जिल्ह्यात तीन लाख १७ हजार ८१८ जनावरांना लसीकरण करण्यात आले.

लम्पी स्कीन हा आजार गोठ्यातील अस्वच्छता, पशुधनाच्या अंगावरील गोचिड व इतर कीटकांमुळे होण्याचा संभव अधिक असतो. हे लक्षात घेऊन जिल्हा प्रशासनातर्फे ग्रामपातळीवर जाऊन मोठ्या प्रमाणात जनजागृती केली जात आहे.

आजच्या घडीला नांदेड जिल्ह्यातील ४५ गावे लम्पी स्कीन बाधित आहेत. या ४५ गावातील पशुधन २२ हजार ७१५ आहे. यातील १७१ बाधित पशुधनाला वेगळे काढून त्यांच्यावर उपचार केले जात आहेत. बाधित गावाच्या पाच किलोमीटर परिघातील गावांची संख्या २८३ आहे. एकूण बाधित गावे ३२८ झाली आहेत.

या बाधित ४५ गावांच्या पाच किलो मीटर परिघातील ३२८ गावांतील जनावरांची संख्या ९२ हजार ४०० आहे. ‘लम्पी’मुळे १३ जनावरांचा मृत्यू झाला आहे. उपलब्ध लस मात्रा तीन लाख

७८ हजार २५० असून पशुपालकांनी घाबरून न जाता आपल्या पशूची स्वच्छता, गोठ्यातील स्वच्छता व पशुवैद्यकीय अधिकारी यांनी सांगितल्याप्रमाणे काळजी घ्यावी, असे आवाहन जिल्हाधिकारी खुशालसिंह परदेशी यांनी केले आहे.