गॅलार्डियाला उष्ण व दमट हवामान चांगले मानवते. कणखरपणामुळे गॅलार्डियाचे पीक वर्षभर घेता येते. हे झाड काटक असल्यामुळे हलक्या ते मध्यम जमिनीत चांगले वाढते, भरपूर उत्पादन देते. पाण्याचा निचरा न होणारी अत्यंत भारी जमीन गॅलार्डियास मानवत नाही. मध्यम पोयट्याची, साधारणतः पाच ते आठ सामू असणारी जमीन निवडावी.
पिक्टा प्रकारातील फुले आकाराने मोठी; परंतु सिंगल असतात- उदा.- इंडियन चीफ रेड, पिक्टा मिक्स्ड इत्यादी, तर लॉरेंझियाना प्रकारातील फुले मोठी व डबल असतात. उदा.- सनशाईन, गेईटी डबल मिक्स्ड, डबल टेट्रा, फिएस्टा इ.गॅलार्डिया फुलपिकांच्या गॅलार्डिया ग्रॅंडिफ्लोरा या प्रकारातील जाती बहुवर्षीय असून, त्यांना मोठ्या आकाराची पिवळसर केशरी आणि लाल रंगाची फुले येतात. या प्रकारामध्ये प्रामुख्याने सन गॉड डॅझलर, वारिअर, गोब्लिन मिस्टर शेरब्रुक इ. जातींचा समावेश होतो.लागवड बियांपासून रोपे तयार करून केली जाते. बियांपासून रोपे तयार करण्यासाठी सर्वप्रथम एक मीटर रुंद, १५ सें. मी. उंचीचे आणि योग्य त्या लांबीचे गादीवाफे तयार करावेत. गादीवाफे तयार करत असताना प्रति चौरस मीटर १० ते १५ कि. ग्रॅ. चांगले कुजलेले शेणखत मातीत मिसळावे.बी गादीवाफ्यावर ओळीत एक ते १.५ सें. मी. खोल पेरावे. दोन ओळींतील अंतर १० सें. मी. ठेवावे. एक हेक्टर लागवडीसाठी १०० ते १५० ग्रॅम बियाणे पुरेसे होते. बी पेरल्यानंतर तीन ते चार आठवड्यांत रोपे चार ते सहा पानांची झाल्यावर लागवडीयोग्य होतात.रोपांची लागवड ऑगस्ट, एप्रिल आणि ऑक्टोबर महिन्यात केल्यास वर्षभर फुले उपलब्ध होऊ शकतात. गॅलार्डियाची लागवड सपाट वाफे अथवा सरी वाफे तयार करून करतात.जमीन आडवी-उभी नांगरून घ्यावी आणि जमिनीत प्रति हेक्टरी २५ ते ३० टन या प्रमाणात चांगले कुजलेले शेणखत मिसळून घ्यावे. नंतर सपाट वाफे तयार करून जमीन व हंगामापरत्वे लागवड ४५ x ६० सें. मी. अथवा ४५ x ३० सें. मी. अंतरावर करावी.गॅलार्डियास प्रति हेक्टरी ५५ किलो युरिया, १५७ किलो सिंगल सुपर फॉस्फेट व ४२ किलो म्युरेट ऑफ पोटॅश ही खते द्यावीत. संपर्क ः ०२०- २५६९३७५० राष्ट्रीय कृषी संशोधन प्रकल्प, गणेशखिंड, पुणे.