सर्व द्राक्ष विभागांमध्ये सध्या निरभ्र वातावरण आहे. येत्या तीन-चार दिवसांमध्ये बहुतांश द्राक्ष विभागामध्ये वातावरण पुन्हा ढगाळ होण्याची शक्यता आहे. सांगलीच्या कवठे महांकाळ, खानापूर, तासगाव, मिरज या भागामध्ये शुक्रवारी (ता. २७) हलका पाऊस एक दोन ठिकाणी होण्याची शक्यता दिसते. बाकी अन्य विभागांमध्ये पावसाची फारशी शक्यता दिसत नाही. नाशिक भागामध्ये शनिवार रविवारनंतर वातावरण जास्त ढगाळ होण्याची शक्यता आहे. या काळात रात्रीचे तापमान १० अंश सेल्सिअसपेक्षा कमी होण्याची शक्यता आहे. या वाढलेल्या थंडीमुळे रात्री व दिवसाच्या तापमानातील फरक वाढतो, त्यामुळे थॉम्सन सीडलेस व त्याचे क्लोन असलेल्या जातींमध्ये मण्यांत पाणी भरण्यास सुरवात झाल्याच्या अवस्थेमध्ये पिंक बेरीचा प्रादुर्भाव वाढू शकतो. सर्वसाधारणपणे प्रत्येक घडावर पेपर लावल्यास पिंक बेरीची समस्या राहत नाही. या वर्षी सुरवातीपासून आलेल्या जास्त थंडीमुळे मण्यात पाणी भरण्याची स्थिती येण्यास उशीर झाला असेल, तरीही येत्या शुक्रवार-शनिवारच्या आधी घडावर पेपर लावण्याचे काम प्राधान्याने करून घ्यावे. ढगाळ वातावरणामध्ये भुरीचा प्रादुर्भाव पुन्हा वाढण्याची शक्यता असते. बागेत भुरीचे थोडेही लक्षण दिसत असल्यास भुरीच्या नियंत्रणासाठी योग्य फवारणी करणे आवश्यक आहे. - यासाठी सल्फर (८० डब्ल्यूजी) दीड ते दोन ग्रॅम प्रति लिटर याप्रमाणे चांगल्या प्रकारे कव्हरेज होईल, असे फवारून घ्यावे. त्यापाठोपाठ जैविक नियंत्रणासाठी अॅम्पिलोमायसीस ८ ते १० मि.लि. प्रतिलिटर या प्रमाणात जरूर फवारावे. सल्फर हे बाह्यस्पर्शी असल्यामुळे त्याच्या कव्हरेजकडे विशेष लक्ष दिले पाहिजे.