Nanded News : जिल्ह्यात यंदाही सोयाबीनचे पीक एक ते दोन दिवसांत पिवळे पडून जात असल्यामुळे शेतकरी हतबल झाले आहेत. मुदखेड तालुक्यातील डोंगरगाव शिवारात अक्षय बापूराव कस्तुरे या शेतकऱ्याने चार एकर सोयाबीन पिकावर रोटावेटर फिरविला आहे.

आणखी दोन एकर सोयाबीन पिवळे पडत असल्यामुळे आठ एकरांपेकी सहा एकर सोयाबीन काढावे लागत असल्याची माहिती त्यांनी ‘अग्रोवन’शी बोलताना दिली. जिल्ह्यातील सोयाबीन पिकावर येलो मोझॅकचा प्रादुर्भाव यंदाही तीव्रतेने जाणवत आहे. मुदखेड तालुक्यातील डोंगरगाव, बारड, शेंबोली, निवघा, इजळी, मुगट, आंबेगाव, चेनापूर, लहान, लोण शिवारातील सोयाबीनचे पीक पिवळे पडत आहे.

डोंगरगाव (ता.मुदखेड) शेतकरी अक्षय बापूराव कस्तुरे यांनी हताश होऊन आपल्या चार एकरांतल्या सोयाबीनवर मंगळवारी (ता. पाच) रोटावेटर फिरविला आहे. श्री. कस्तुरे यांनी आठ एकर क्षेत्रांत सोयाबीनची पेरणी केली होती. त्यातील जवळपास सहा एकर क्षेत्रांवर येलो मोझॅकचा मोठ्या प्रमाणात प्रादुर्भाव झाल्याचे स्पष्ट दिसून आले. दोन दिवसांपासून सोयाबीनची पाने पिवळसर पडत आहेत.

त्यामुळे उत्पादनाची कोणतीही अपेक्षा उरलेली नसल्याने चार एकर क्षेत्रांतील पिकावर रोटावेटर फिरवावा लागला, अशी खंत त्यांनी ‘ॲग्रोवन’शी बोलताना व्यक्त केली. गावातील कैलास भीमराव कस्तुरे व श्यामराव संभाजी कस्तुरे यांचेही सोयाबीन पिवळे पडल्यामुळे ते दोघेही पीक काढून टाकत आहेत. दर वर्षीप्रमाणे यंदाही डोंगरगाव परिसरात या विषाणूचा प्रादुर्भाव वाढत आहे.

परंतु अद्याप कृषी विभागाकडून प्रभावी उपाययोजना किंवा मार्गदर्शन मिळाले नसल्याचे शेतकऱ्यांचे म्हणणे आहे. यामुळे शेतकरी पुन्हा एकदा आर्थिक संकटात सापडले आहेत. शासनाने तत्काळ येलो मोझॅकचा प्रादुर्भाव असलेल्या भागांची पाहणी करून नुकसानग्रस्त शेतकऱ्यांना आर्थिक मदत द्यावी, अशी मागणी स्थानिक शेतकरी करत आहेत.

तीस हजार खर्च वाया

अक्षय कस्तुरे यांनी चार एकर सोयाबीनवर रोटावेटर फिरविला. यामुळे त्यांचे तीस हजार रुपये पाण्यात गेले आहेत. चार बॅग सोयाबीनसाठी बारा हजार रुपये, खतासाठी पाच हजार, दोन वेळा फवारणी साडेतीन हजार, दोनवेळा निंदणी आठ हजार, कोळपणी दोन वेळा तीन हजार असा एकूण तीस हजारांपेक्षा अधिक खर्च वाया गेल्याचे त्यांनी सांगितले.