Nanded News : जिल्ह्यातील २५३ गावात जलयुक्त शिवार योजना २.० राबविण्यात येणार आहे. यासाठी जलयुक्तमध्ये इतर अभिसरणाकडून एकूण ५३५१ कामे होणार आहेत. यासाठी १३४ कोटी ४६ लाख रुपयांचा निधी अपेक्षीत असल्याची माहिती कृषी विभागाच्या सूत्राने दिली.

जलयुक्त शिवार योजना महाराष्ट्र जलयुक्त शिवार २.० म्हणून ओळखली जात आहे. जलयुक्त शिवार योजनेंतर्गत राज्य शासनाच्या मृद व जलसंधारण विभागामार्फत २०२३-२४ या वर्षात तीन हजार ८८६ कोटी रुपये खर्च केले जाणार आहेत.

जलयुक्तचा पहिला टप्पा, पंतप्रधान कृषी सिंचन योजना, नानाजी देशमुख कृषी संजीवनी प्रकल्प व आदर्श गावसह इतर पाणलोट क्षेत्र विकास कार्यक्रममधील पूर्ण झालेली आणि कार्यान्वित गावे वगळून उर्वरित गावांपैकी पाणलोट कार्यक्रम अंमलबजावणीसाठी पाच मुद्यांच्या आधारे गावांची निवड करण्यात आली आहे. नांदेड जिल्ह्यातही या योजनेच्या अंमलबजावणीसाठी यंत्रणा कामाला लागली आहे.

जिल्ह्यात २५३ गावात ही योजना राबविण्यात येणार आहे. यात एकूण ५३५१ कामे होणार आहेत. यावर १३४ कोटी ४६ लाख रुपयांचा निधी खर्च होणार आहे. जिल्हा जलसंधारण अधिकारी कार्यालयाकडून सर्व यंत्रणांकडून कृती आराखडा तयार करुन घेतला आहे.

या आराखड्याला जिल्हास्तरीय समितीकडून मान्यता घेण्याचे काम सुरु आहे. या समितीकडून मान्यता मिळाल्यानंतर कामांना कार्यारंभ आदेश देण्यात येणार असल्याची माहिती जलसंधारण विभागाकडून देण्यात आली.

विविध स्त्रोतांमधून निधीची उपलब्धता

केंद्र व राज्य पुरस्कृत मृद आणि जलसंधारण-कृषी विभागाच्या योजना, महात्मा गांधी राष्ट्रीय ग्रामीण रोजगार योजना, जिल्हा नियोजन व विकास समिती निधी, जिल्हा परिषद, सीएसआर निधी, सार्वजनिक खासगी भागीदारी, लोकसहभाग आदी स्त्रोतांमधून निधीची उपलब्धता केली जाणार आहे. अभिसरणातून निधी उपलब्ध न झाल्यास जलयुक्तच्या लेखाशीर्षातून निधीची तरतूद करण्यात येणार असल्याची माहिती मिळाली.