Pune News: गुलटेकडी येथील पुणे कृषी उत्पन्न बाजार समितीच्या आवारातील फूल बाजाराच्या नवीन इमारतीच्या मूळ आराखड्यात बदल करण्यात आला आहे.

या इमारतीत अतिरिक्त दोन मजले, वाहनतळासाठी एक अतिरिक्त तळमजला वाढविण्यात आल्याने अद्याप बांधकाम सुरू असल्याची माहिती पणनमंत्री जयकुमार रावल यांनी गुरुवारी (ता. ३) दिली. नऊ वर्षांपासून सुरू असलेल्या या कामाला विलंब झाल्याची अप्रत्यक्ष कबुलीही श्री. रावल यांनी विधानसभेत दिली.

बाजार समितीने २०१६ मध्ये ५४ कोटी रुपये खर्च करून फूल बाजार इमारत उभारण्याचे निश्चित करण्यात आले होते. मात्र या इमारतीचे काम अद्यापही पूर्ण झालेले नाही. या संदर्भात आमदार बापू पठारे यांनी हा मुद्दा तारांकित प्रश्नाद्वारे उपस्थित केला. त्या संदर्भात बोलताना रावल यांनी माहिती दिली.

सूचना करूनही काम अपूर्ण

‘इमारतीच्या बांधकामाची पाहणी जानेवारी महिन्यात करण्यात आली होती. त्या वेळी उर्वरित काम शंभर दिवसांत पूर्ण करण्याची सूचना केली होती.

मात्र इमारत उभारणीचे काम सुरू असल्याने कोणावर कारवाई करण्याचा प्रश्नच येत नाही,’ असे मंत्री रावल यांनी सांगितले. या प्रकल्पाचे काम कधी पूर्ण होणार, असा सवाल बाजार घटकांतून विचारला जात आहे.