Ahilyanagar News: क्रांतिसूर्य महात्मा फुले व सावित्रीबाई फुले यांनी महिलांसाठी शिक्षणाची दारे खुली केली. त्याचाच परिणाम महिला आता प्रत्येक क्षेत्रात महत्त्वाचे योगदान देत आहेत.

शिक्षण, विज्ञान, राजकारण क्रीडा, उद्योग-व्यवसाय, उद्योजकता अशा सर्वत्रच महिला आपले कर्तृत्व सिद्ध करत आहेत. आपण महिलांचा आदर केला पाहिजे महिला केवळ कुटुंबाचा आधार नसून समाजाची खरी ताकद असल्याचे मत माजी मंत्री बाळासाहेब थोरात यांनी व्यक्त केले.

सह्याद्री महाविद्यालयात युनियन बँक ऑफ इंडिया, जयहिंद महिला मंच, संग्राम पतसंस्था आणि सह्याद्री महाविद्यालय यांच्या संयुक्त विद्यमाने जागतिक महिला दिनाचे औचित्य साधून ‘आर्थिक साक्षरता’ या विषयावर विशेष व्याख्यान व ‘लोकशास्र सावित्री’ या नाटकाचे आयोजन करण्यात आले होते. यावेळी आयोजित कार्यक्रमात ते बोलत होते.

या वेळी व्यासपीठावर माजी आमदार डॉ. सुधीर तांबे, युनियन बँकेचे अधिकारी मनीष कुमार, कांचनताई थोरात, माजी नगराध्यक्षा दुर्गाताई तांबे, शर्मिला देशमुख, शरयुताई देशमुख, डॉ. सोमनाथ मुटकुळे, नामदेव गुजाळ, हिरालाल पगडाल, राणीप्रसाद मुंदडा, मंजुळ भारद्वाज, प्रमिला अभंग आदी मान्यवर उपस्थित होते. यावेळी युनियन बँकेचे अधिकारी मनीष कुमार, शर्मिला देशमुख यांनीही आपली मनोगते व्यक्त केली.