Pune News: पुणे कृषी उत्पन्न बाजार समितीमध्ये अनेक कामे ही चुकीच्या पद्धतीने आणि अनियमितपणे झाल्याच्या प्रकार गंभीर आहे. या बाबतच्या तक्रारीही प्राप्त झाल्या आहेत. या सर्व कामांची चौकशी लावणार असल्याचे पणनमंत्री जयकुमार रावल यांनी सांगितले.

महाराष्ट्र राज्य कृषी पणन मंडळ येथे पणनमंत्री जयकुमार रावल विविध बैठकांसाठी आले होते. या वेळी पत्रकारांनी विचारलेल्या प्रश्‍नांना त्यांनी उत्तरे दिली. पेरणे (ता. हवेली) येथील जागा ताब्यात नसताना ५३ लाख रुपयांचे बिल अदा करण्यात आल्याच्या धक्कादायक प्रकाराबाबतही रावल यांनी भाष्य केले.

या बाबतची तत्काळ चौकशी लावण्यात येईल तसेच गेल्या २० वर्षांपासून बाजार समितीच्या अनेक चौकशा प्रलंबित आहेत. तसेच विद्यमान संचालक अस्तित्वात आल्यापासून देखील अनेक चुकीच्या आणि बेकायदेशीर कामांबाबत चौकशा देखील सुरू आहेत. या बाबत काही संचालक उघडपणे बोलत आहेत, की सचिव आमचेच आहेत त्यांच्या संमतीनेच आम्ही कामे करत आहोत.

त्यामुळेच ते चुकीच्या कामांना पाठिंबा देतात कोणत्याही प्रकारची कारवाई करत नाहीत. तसेच, पणन संचालकांना देखील आम्ही मॅनेज केले आहे आणि आम्ही पणनमंत्र्यांना देखील मॅनेज करू असे काही संचालक बोलत असल्याच्या पार्श्‍वभूमीवर रावल यांना विचारले असता ते म्हणाले, की अशी वक्तवे करण्याचा प्रकार गंभीर आहे. बाजार समितीच्या संबंधित ज्या सर्व चौकशी आहेत त्या तत्काळ पूर्ण करण्याच्या सूचना देणार आहे. तसेच चुकीच्या कामांना कोणत्याही प्रकारे पाठिंबा दिला जाणार नाही. चुकीच्या कामांवर कारवाई केली जाईल.

चुकीच्या कामांचे पेव?

पुणे बाजार समिती ही राष्ट्रीय बाजार होण्याच्या हालचाली वरिष्ठ पातळीवर सुरू आहेत. त्यामुळे संचालक मंडळ आणि पदाधिकारी धास्तावले आहेत. त्यामुळे अनधिकृत आणि चुकीची कामे करण्यावर भर दिला जात आहे. कोणत्याही प्रकारची कामे आणा आणि पैसे कमवा, असे उद्योग बाजार समितीमध्ये खुलेआम सुरू आहेत, अशी चर्चा सुरू आहे.