Satara News : डोंगरात फैलावलेला वणवा आंब्याच्या बागेत घुसल्याने चार शेतकऱ्यांच्या बागेतील आंब्याची सुमारे दीड हजार झाडे होरपळल्याची घटना रविवारी (ता. २) दुपारी मस्करवाडी (कसणी, ता. पाटण) येथे घडली. तब्बल चार तासांच्या शर्थीच्या प्रयत्नानंतर आग आटोक्यात आली. मात्र, तोपर्यंत झाडे, पाणी पुरवठ्याची यंत्रणा व अन्य साहित्य जळून मोठे नुकसान झाले.

डोंगराच्या कुशीत वसलेल्या कसणी परिसरात अनेक शेतकऱ्यांच्या मालकीच्या आंबा व इतर फळझाडांच्या बागा आहे. रविवारी सकाळी साडेअकराच्या सुमारास कसणीपासून जवळच असलेल्या मस्करवाडी येथे आंब्याच्या बागेत वणवा घुसल्याचे शेतकऱ्यांच्या लक्षात आल्यावर त्यांनी तातडीने तिकडे धाव घेतली.

तोपर्यंत सुमारे सहा एकरांतील बागांचा परिसर आगीने वेढलेला होता. शेतकऱ्यांनी पाणी व झाडांच्या डहाळ्याचा वापर करून आग नियंत्रणात आणण्याचा प्रयत्न केला. मात्र, तोवर विष्णू आनंदा मस्कर व लक्ष्मण आनंदा मस्कर यांच्या बागेतील २५०, राजू शामराव मस्कर यांच्या बागेतील २५० आणि माजी सरपंच मारुती ज्ञानू मस्कर यांच्या बागेतील सुमारे एक हजार आंब्याची झाडे होरपळली.

तब्बल चार तासांच्या शर्थीच्या प्रयत्नानंतर आग आटोक्यात आली. मात्र, तोपर्यंत झाडे तसेच पाणीपुरवठ्याची यंत्रणा व अन्य साहित्य जळून मोठे नुकसान झाल्याचे शेतकऱ्यांनी सांगितले. जवळच लोकवस्ती आहे. मात्र, आगीवर नियंत्रण मिळविल्याने सुदैवाने घरांचे नुकसान टळले. आगीत वीज पुरवठ्याची यंत्रणाही जळाल्याने त्या परिसरातील वीजपुरवठा खंडित झाल्याचे ग्रामस्थांनी सांगितले.

नुकसान भरपाईची मागणी

आगीत जळालेल्या आंब्याच्या बागा सहा वर्षांपूर्वी तयार केलेल्या होत्या. कूपनलिकेद्वारे पाण्याची व्यवस्था केली होती. केशर हापूस जातीचे आंबे आहेत. नुकसानीचा नेमका आकडा रात्री उशिरापर्यंत समजू शकला नाही. आग विझविताना चार जणांना किरकोळ दुखापतही झाली आहे. शासनाने पंचनामा करून तातडीने मदत द्यावी, अशी मागणी नुकसानग्रस्त शेतकऱ्यांनी केली आहे.