Sangli News : नैसर्गिक संकटामुळे द्राक्षाच्या उत्पादनात घट झाली आहे. त्यामुळे यंदा बेदाण्याला द्राक्षाची टंचाई भासत आहे. द्राक्षाच्या कमतरतेमुळे यंदा बेदाणा निर्मितीत घट येण्याची शक्यता आहे. बेदाणा निर्मिती करणारे पन्नास टक्के शेड रिकामे पडले आहेत. शेड सुरू करायची की नाही याबाबत शेडमालकांमध्ये द्विधावस्था निर्माण झाली आहे
यंदाचा बेदाणा निर्मितीचा हंगाम कवठेमहांकाळ तालुक्यातील नागज आणि सांगोला तालुक्यातील जुनोनी भागांत सुरू झाला आहे. दर वर्षी जानेवारी महिन्याच्या पहिल्या आठवड्यात सुरू होतो. मात्र, यंदा द्राक्ष हंगाम धरण्यापासून ऑक्टोबरपर्यंत पाऊस होता. त्यामुळे द्राक्ष पिकाचे मोठ्या प्रमाणात नुकसान झाले आहे. परिणामी द्राक्षाच्या उत्पादनात ५० टक्के घट झाली आहे. त्यामुळे बेदाणा निर्मितीचा हंगाम पंधरा दिवस लांबणीवर गेला.
दर वर्षी फेब्रुवारीच्या दुसऱ्या आठवड्यापासून बेदाणा शेडवर शेतकऱ्यांची लगबग सुरू असते. बेदाणा तयार करण्यासाठी शेतकरी तळ ठोकून असतात. शेतकरी बेदाणा शेडवर दराची आणि उत्पादन किती होईल याची चर्चा सुरू असते. दर्जा यांसह अनेक गोष्टींची देवाणघेवाण होते.
मात्र, यंदाच्या हंगामात नागज आणि जुनोनी भागांतील चित्र वेगळे दिसत आहे. बेदाणा निर्मितीच्या पट्ट्यामध्ये बहुतांश ठिकाणी द्राक्ष विक्रीत करून राहिलेल्या शिल्लक मालापासून बेदाणा उत्पादन करण्याचे काम सुरू आहे. फेब्रुवारीचा दुसरा आठवडा सुरू झाला असला तरी बेदाणा निर्मितीची गती मंदावली असल्याचे चित्र आहे. बेदाणा तयार करण्यासाठी शेतकऱ्यांनी सध्या तरी पाठ फिरवली असल्याचे दिसून येत आहे.
बेदाणा शेडवर शांतता
हंगाम सुरू झाला की बेदाणा तयार करण्यासाठी शेतकरी शेडवर नंबर लावतात. त्यानुसार बेदाणा तयार करण्याला प्राधान्य दिले जाते. त्यामुळे बेदाणा तयार करणाऱ्या शेतकऱ्यांची वर्दळ राहते. परंतु बेदाणा करण्यासाठी शेतकरी कमी प्रमाणात चौकशी करत असल्याचे दिसून येत आहे. त्यामुळे सध्या शांतता आहे. दरम्यान, मार्चच्या पहिल्या आठवड्यापासून बेदाणा निर्मितीला गती येईल, अशी शक्यताही बेदाणा शेड मालकांनी व्यक्त केली आहे.
पन्नास टक्के शेड बेदाण्यासाठी सज्ज
सांगली जिल्ह्यातील नागज, मिरज तालुक्यांचा पूर्व भाग आणि सांगोला तालुक्यातील जुनोनी भागात गत वर्षी २००० हजार शेडवर बेदाणा तयार झाला होता. मात्र यंदा पन्नास टक्के म्हणजे एक हजार शेड बेदाणा निर्मितीसाठी सज्ज झाले आहेत. त्यापैकी ५०० शेडवर अल्प प्रमाणात बेदाणा निर्मिती झाली असून उर्वरित पन्नास टक्के शेड ओस पडले आहेत.
- बेदाणा निर्मितीचा हंगाम मंदावलेलाच
- पन्नास टक्के शेड रिकामे
- द्राक्षाला चांगल्या दरामुळे शेतकऱ्याची बेदाणा निर्मितीकडे पाठ
- शेड सुरू करण्याबाबत द्विधावस्था
दर वर्षी सहा ते सात टन बेदाण्याचे उत्पादन घेतो. यंदा द्राक्ष हंगामालाच निसर्गाचा फटका बसला आहे. त्यामुळे या वर्षी पाच ते सहा टन बेदाण्याचे उत्पादन अपेक्षित आहे. सध्या बेदाण्याला दर चांगले मिळत असून दर वाढतील अशी अपेक्षा आहे.- अमोल विठ्ठल खोत, बेदाणा उत्पादक शेतकरी, कोंगनोळी, ता. कवठेमहांकाळ
या वर्षी फेब्रुवारी महिना उजाडला तरी केवळ पंधरा टन बेदाणा निर्मितीसाठी आला आहे. या भागांत शेकडो बेदाणा शेड आहेत. सर्वच ठिकाणी अशी परिस्थिती पाहायला मिळत आहे.- सुनील माळी, बेदाणा उत्पादक व शेड मालक
यंदा थॉमसन आणि सोनाका या बेदाण्यांच्या वाणांना प्रति किलो पन्नास रुपयांपर्यंत दर मिळत आहे. बेदाण्याला गेली दोन वर्षे अपेक्षित दर मिळाला नाही. त्यामुळे शेतकरी बेदाणा तयार करण्यासाठी धोका घेण्यास तयार नसल्याचे चित्र आहे.- अजित पाटील, बेदाणा शेड मालक, चोरीची, ता. कवठेमहांकाळ
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.