Jalgaon News: खानदेशात कलिंगडाची लागवड थांबली आहे. लागवड मार्चच्या सुरुवातीपर्यंत सुरूच होती. परंतु कमी दर व वाढलेली उष्णता यामुळे आता लागवड थांबली आहे. लागवड यंदा डिसेंबरमध्ये अधिक होती. परंतु पिकात उत्पादन कमी आले व कमी दरामुळे नफाही हाती आला नाही.

कलिंगडाची लागवड खानदेशात डिसेंबरमध्ये सर्वत्र झाली होती. रमजान महिन्यात आवक किंवा काढणी होईल, या दृष्टीने लागवडीचे नियोजन केले होते. परंतु प्रतिकूल वातावरण व अधिकचा खर्च व कमी दर यामुळे उत्पादन घटले. परिणामी, मार्चअखेरची लागवड अनेकांनी टाळली आहे.

मार्चमधील जळगाव जिल्ह्यातही लागवड निम्मी घटली आहे. मागील हंगामात जिल्ह्यात मार्च व एप्रिलच्या सुरुवातीच्या कालावधीत कलिंगडाची लागवड बऱ्यापैकी झाली होती. एकूण लागवड ५०० हेक्टरपेक्षा अधिक झाली होती. परंतु यंदा ही लागवड अत्यल्प आहे. रमजान महिन्यातील दरांचा लाभ घेण्यासाठीची लागवड खानदेशात सुमारे आठ हजार हेक्टरवर झाली होती.

जळगाव जिल्ह्यातील जामनेर, चोपडा, जळगाव, यावल, रावेर, मुक्ताईनगर भागांत अधिक लागवड झाली होती. नंदुरबारातील शहादा, तळोदा, नंदुरबार, धुळ्यातील साक्री, धुळे, शिरपूर व अन्य भागांतही डिसेंबर व जानेवारीत मोठी लागवड झाली होती. परंतु मार्च महिन्याची लागवड जेमतेम २०० ते ३०० हेक्टरपर्यंतच आहे, असा अंदाज आहे.

मे महिन्यात लागवड कमी असण्याची शक्यता

कलिंगडाची लागवड पुढील ३० ते ३५ दिवसांत फक्त ५० ते ६० हेक्टरवर होईल. तर मे महिन्यातील लागवड यापेक्षा कमी असेल, अशी माहिती मिळाली. कलिंगडासाठी खानदेशात जामनेर, चोपडा, धुळ्यातील शिरपूर, नंदुरबारातील तळोदा व शहादा हा भाग प्रसिद्ध आहे. यात एकट्या जामनेरातील लागवड ३०० ते ३५० हेक्टरपेक्षा अधिक असते.