Latur News : तालुक्यातील भंडारवाडी येथील रेणा मध्यम प्रकल्पात सध्या ७७ टक्के पाणीसाठा शिल्लक आहे. फेब्रुवारीच्या पहिल्या आठवड्यात रेणा नदीवरील घनसरगाव, रेणापूर, जवळगा व खरोळा बंधारे भरण्यासाठी पाणी सोडण्यात येणार आहे. त्यामुळे रब्बी पिकांसह उसाला मोठा आधार होणार आहे.

यावर्षी पावसाळ्यात दमदार पाऊस झाल्यामुळे रेणा प्रकल्पात १०० टक्के पाणीसाठा झाला होता. प्रकल्प पूर्ण क्षमतेने भरल्यामुळे पाऊस पडला की अनेक वेळा नदीपात्रात पाणी सोडावे लागले. प्रकल्प पूर्ण क्षमतेने भरल्यामुळे शेतकरीही आनंदीत झाले होते.

यातच रेणा नदीवरील चारही बंधारे पूर्ण क्षमतेने भरले होते. परंतु, रब्बी हंगामातील पिकांना पाणी देण्यासाठी बंधाऱ्यातील पाण्याचा शेतकऱ्यांनी मोठ्या प्रमाणावर उपसा केला. परिणामी विविध बंधाऱ्यांमध्ये अत्यल्प पाणीसाठा शिल्लक राहिला आहे.

त्यामुळे फेब्रुवारीच्या पहिल्या आठवड्यात रेणा प्रकल्पातून नदीपात्रात पाणी सोडण्यात येणार आहे. त्यात चारही बंधारे पूर्ण क्षमतेने भरून घेतले जाणार आहेत, अशी माहिती शाखा अभियंता कुलकर्णी यांनी दिली.

रेणा मध्यम प्रकल्प सद्यःस्थिती

दलघमी उपयुक्त पाणीसाठा १५.७६१

दलघमी मृत पाणीसाठा १६.८९

पाण्याची टक्केवारी ७६.६७ टक्के

रेणा नदीवरील बंधाऱ्याच्या पाण्याची टक्केवारी

रेणापूर बंधारा ५.६८ टक्के

जवळगा बंधारा १० टक्के

खरोळा बंधारा २२.४० टक्के