Pune News : फेब्रुवारी महिन्याच्या पहिल्या आठवड्यातच जिल्ह्यात पाणीटंचाईच्या झळा अधिक जाणवू लागल्या आहेत. जिल्ह्यातील पुरंदर व बारामती भागांतील १५ गावे व ९९ वाड्यावस्त्यांना १९ टँकरने पाणीपुरवठा केला जात आहे.

मागील वर्षी मॉन्सूनचे उशिरा आगमन झाले होते. मात्र अधूनमधून पडलेल्या दमदार पावसामुळे जिल्ह्यातील जवळपास सर्वच धरणे १०० टक्के भरली होती. पूर्व भागात पावसाचे प्रमाण कमी होते. त्यामुळे या भागात पावसाळ्यातही टॅकरने पाणीपुरवठा करण्याची वेळ आली होती.

प्रामुख्याने पुरंदरमधील राजुरी, रिसे पिसे या गावांत पावसाळ्यात टॅकरने पाणीपुरवठा सुरू होता. सध्या पाणीटंचाईची समस्या अधिक तीव्र होऊ लागली आहे. मार्च, एप्रिल, मे आणि जून महिन्यांत टँकरच्या संख्येमध्ये वाढ होऊन पाणीटंचाई अधिक भासण्याची शक्यता वर्तविण्यात येत आहे.

गेल्या वर्षी याच काळात पाण्याची फारशी अडचणी आलेली नव्हती. त्यामुळे जिल्ह्यात एकही टॅकर सुरू नव्हता. गेल्या वर्षीच्या तुलनेत चालू वर्षी पाण्याची समस्या भीषण असल्याने टॅकरच्या संख्येत वाढ झालेली दिसून येते. गेल्या आठवड्यात १० गावे व ६१ वाड्यावस्त्यांवर १२ टॅकरने पाणीपुरवठा सुरू होता.

यात शासकीय ९, खासगी ३ टॅकरचा समावेश होता. सध्या जिल्ह्यात शासकीय ९, तर खासगी १० टॅकरने पाणीपुरवठा सुरू आहे. हा पाणीपुरवठा पुरंदर, बारामती भागांतील गावांमध्ये सुरू आहे. इतर भागांतही पाणीटंचाई भेडसावण्याची परिस्थिती निर्माण होण्याची शक्यता आहे.