Jalna News : तालुक्यात मागील तीन दिवस भीज पाऊस झाला. त्याचा काही भागाला फायदा झाला आहे. मात्र, जिथे सिंचनाचे स्त्रोत नाही. तिथे अद्याप देखील टंचाईची समस्या कायम आहे. त्यात तालुक्यातील कडेगाव आणि माळेगाव या दोन गावांचा समावेश आहे. या दोन्ही गावातून जाणाऱ्या लहुकी नदीला मागील दोन वर्षात एकदाही पाणी वाहून गेले नाही. त्यामुळे या दोन्ही गावांत पाणी टंचाईची समस्या कायम आहे.

प्रशासनाने टंचाईग्रस्त गावांचे कुठलेही सर्वेक्षण न करता शासकीय शिरस्ता पाळत ३१ ऑगस्टपासून टंचाईग्रस्त गावांचे टँकर बंद केले आहेत. शासनाच्या अशा अंधाधुंद धोरणामुळे कडेगाव आणि माळेगाव येथील नागरिक भर पावसाळ्यात पिण्याच्या पाण्याचा शोध घेत आहेत, ही वस्तुस्थिती आहे.

बदनापूर तालुक्यात मागील दोन वर्षांपासून जेमतेम पाऊस पडत आहे. मागच्या वर्षी तर पावसाने वार्षिक सरासरी देखील गाठली नव्हती. यंदा श्रावणात पाऊस धाऊन आला खरा; मात्र त्याने काही भागात दुजाभाव केला. त्यात रोषणगाव मंडळातील कडेगाव, माळेगाव, वरुडी, कुसळी आदी गावे भरडली गेली आहेत.

अर्थात काही गावातील ग्रामपंचायतींनी किमान पिण्याचे पाणी मिळावे म्हणून काही स्त्रोत तयार केले आहेत. मात्र, आजघडीला कडेगाव आणि माळेगाव अशी दोन गावे चक्क पिण्याच्या पाण्यासाठी व्याकूळ आहेत.

त्याला कारण देखील तसे आहे, या दोन्ही गावांत दोन वर्षात अगदीच तुरळक पाऊस झाला. या गावातून जाणारी लहूही नदी नेहमी कोरडीठाक पडलेली असते. त्यामुळे सिंचन आणि पाणीसाठा हा विषय या दोन्ही गावांसाठी नगण्य आहे. एकूणच अशा परिस्थितीत पावसाळ्याचे तीन महिने सरले तरी दोन्ही गावे टंचाईच्या संकटात सापडले आहेत.