Akola Water Scarity : पाणीटंचाई लक्षात घेता जिल्ह्यातील अकोट, तेल्हारा, मूर्तिजापूर, अकोला व बार्शीटाकळी तालुक्यांतील ४९ गावांसाठी पाणीटंचाई निवारणाच्या ६१ उपाययोजना जिल्हाधिकारी अजित कुंभार यांनी मंगळवारी (ता. २०) मंजूर केल्या आहेत. संबंधित गावातील नागरिकांना पाणीटंचाईपासून दिलासा मिळणार असून या कामांसाठी एक कोटी १७ लाख ४ हजार ७२६ रुपये खर्च अपेक्षित आहे. पाणीटंचाई निवारणाच्या उपाययोजना मंजूर करण्यात आल्याने पाणीटंचाई निवारणाची कामे करण्याचा मार्ग मोकळा झाला आहे.

उन्हाळ्यात ग्रामीण भागातील रहिवासी नागरिकांना पिण्यासाठी पाणी सहज उपलब्ध व्हावे, यासाठी जिल्हा परिषदेच्या ग्रामीण पाणीपुरवठा विभागाच्या वतीने प्रत्येकवर्षी संभाव्य पाणीटंचाई निवारण कृती आराखडा तयार करण्यात येताे. त्याअंतर्गत या वर्षी जिल्हा परिषदेच्या पाणीपुरवठा विभागाने यंदा पाणीटंचाई निवारण आराखडा तयार करण्यास विलंब केला.

परंतु अखेर ग्रामीण पाणीपुरवठा विभागाने आराखडा तयार करून जिल्हा परिषदेच्या तत्कालीन मुख्य कार्यकारी अधिकारी बी. वैष्णवी यांच्याकडे सादर केला होता. त्याला मंजुरी दिल्यानंतर जिल्हाधिकारी कुंभार यांच्या मंजुरीसाठी आराखडा सादर करण्यात आला. आराखड्याला जिल्हाधिकारी कुंभार यांनी १३ फेब्रुवारी रोजी मंजुरी दिली होती. दरम्यान, आराखड्यात प्रस्तावित करण्यात आलेल्या गावांपैकी ४९ गावांमध्ये कूपनलिका व विंधन विहिरीच्या ६१ उपाययोजना मंजूर करण्यात आल्या आहेत.

जिल्हाधिकाऱ्यांनी कूपनलिकेच्या ४० उपाययोजना मंजूर केल्या आहेत. विंधन विहिरीच्या २१ उपाययोजना मंजूर केल्या आहेत. त्यापैकी सर्वाधिक १९ उपाययोजना तेल्हारा तालुक्यासाठी आहेत. त्यानंतर तेल्हारा तालुक्यात १३, अकोल्यामध्ये सात, बार्शीटाकळी तालुक्यात सहा, मूर्तिजापूरमधील पाच उपाययोजनांचा समावेश आहे.

कामांना २० जूनची डेडलाइन

कूपनलिका आणि विंधन विहिरींच्या उपाययोजनांची कामे २० जूनपर्यंत किंवा त्यापूर्वी पूर्ण करून त्याद्वारे प्रत्यक्ष पाणीपुरवठा करण्यात यावा. योजनेचे काम पूर्ण होताच त्याबाबत कार्यालयास कळविण्यात यावे. ग्रामस्थांना पिण्याच्या पाण्याची टंचाई भासणार नाही, याकडे विशेष लक्ष देण्यात यावे, असा उल्लेख जिल्हाधिकारी यांच्या आदेशात करण्यात आला आहे.