Parbhani News : वाढलेले तापमान, बाष्पीभवनाचा वाढलेला वेग, उपसा आदी कारणांमुळे लघू तसेच मध्यम प्रकल्पांतील पाणीसाठा संपुष्टात येत आहे. गावे, वाड्या, वस्त्यांमधील पाणी टंचाईचे संकट दिवसागणिक अधिक गहिरे होत आहे.

जायकवाडी पाटबंधारे विभागाकडील गुरुवारी (ता. २) पर्यंतच्या आकडेवारीनुसार परभणी जिल्ह्यातील २२ पैकी १० लघू तलाव कोरडे पडले आहेत. तर ८ लघू तलावांतील पाणीसाठा जोत्याखाली गेला आहे. केवळ ४ तलावांमध्ये सरासरी ५ टक्के उपयुक्त पाणीसाठा शिल्लक राहिला आहे. दोनपैकी मासोळी (ता. गंगाखेड) मध्यम प्रकल्पातील पाणीसाठा जोत्याखाली गेला असून करपरा (ता. जिंतूर) मध्यम प्रकल्पात केवळ १ टक्का पाणीसाठा शिल्लक राहिला आहे.

जायकवाडी पाटबंधारे विभागाकडून गुरुवारी (ता. २) घेण्यात आलेल्या लघू तसेच मध्यम प्रकल्पांतील पाणी पातळीच्या नोंदीनुसार जिंतूर तालुक्यातील देवगाव, जोगवाडा, बेलखेडा, वडाळी, चारठाणा, चिंचोली, केहाळ, दहेगाव, भोसी, आडगाव हे १० लघू तलाव कोरडे पडले आहेत. पेडगाव (ता. परभणी), आंबेगाव (ता. मानवत), नखातवाडी (ता. सोनपेठ), कोद्री (ता. गंगाखेड), टाकळगाव (ता. गंगाखेड), कवड (ता. जिंतूर),

मांडवी (ता. जिंतूर), पाडळी (ता. जिंतूर) या ८ लघू तलावांतील पाणीसाठा जोत्याखाली गेला आहे. झरी (ता. पाथरी) तलावामध्ये ६८ टक्के, तांदूळवाडी (ता. पालम) तलावात १६ टक्के, राणीसावरगाव (ता. गंगाखेड) तलावात १५ टक्के, पिंपळदरी (ता. गंगाखेड) तलावात २ टक्के मिळून ४ लघू तलावांमध्ये सरासरी १.९६९ दलघमी म्हणजेच ५ टक्के उपयुक्त पाणीसाठा शिल्लक आहे.

२०२३ मध्ये २ मे रोजी जिल्ह्यातील २२ लघू प्रकल्पांमध्ये सरासरी ६.८०२ दलघमी (१६ टक्के) उपयुक्त पाणीसाठा शिल्लक होता. गुरुवारी (ता. २) जिल्ह्यातील निवळी (ता. जिंतूर) येथील करपरा मध्यम प्रकल्पाच्या जलाशयात ०.१६० दलघमी (१ टक्का) पाणीसाठा शिल्लक होता. गंगाखेड तालुक्यातील मासोळी प्रकल्पातील पाणीसाठा जोत्याखाली गेला आहे. २०२३ मध्ये २ मे रोजी करपरा मध्यम प्रकल्पात ७.७६३ दलघमी (३१ टक्के) व मासोळी मध्यम प्रकल्पात १०.०७५ दलघमी (३७ टक्के) तर दोन प्रकल्पांमध्ये सरासरी १७.८३८ दलघमी (३४.२८ टक्के) उपयुक्त पाणासाठा होता.