Parbhani News : यंदाच्या पावसाळ्यात अद्याप सर्वदूर जोरदार पाऊस झालेला नाही. सार्वजनिक पाणीपुरवठा योजनांचे जलस्रोत अद्याप आटलेले आहेत. जिल्ह्यातील पाणीटंचाईची समस्या दिवसागणिक गंभीर होत चालली आहे. शुक्रवार (ता. १३) अखरेच्या तुलनेत अधिग्रहित विहिरींच्या संख्येत २ ने भर पडली आहे.

शुक्रवार (ता. २०) अखेर ९ तालुक्यातील ५६ गावातील ६६ विहिरींचे अधिग्रहण करण्यात आले आहे. टँकरची संख्या मात्र ‘जैसे थे’ असून दोन तालुक्यांतील ४ गावे आणि एका वाडीवर ८ टँकर सुरू आहेत, अशी माहिती जिल्हा परिषदेच्या ग्रामीण पाणीपुरवठा विभागातील सूत्रांनी दिली. मेमधील जोरदार पूर्वमोसमी पावसानंतर जून महिन्यात पावसाचा जोर मंदावला आहे. तापमानात वाढ झाली आहे.

जोराच्या वाऱ्यामुळे बाष्पीभवनाचा वेग वाढला आहे. पाणीपुरवठा स्रोतांची पाणीपातळी झपाट्याने खालावली आहे. त्यामुळे जिल्ह्यातील पाणीटंचाईची समस्या जून महिन्यात देखील कायम आहे.

जिल्हा परिषदेच्या ग्रामीण पाणी पुरवठा विभागाने पाणीटंचाई निवारणार्थ उपाययोजना केल्या आहेत. यंदा २ मेपर्यंत जिंतूर तालुक्यात १ टँकर सुरू झाले होता. २३ मे अखेर जिंतूर तालुक्यातील ४ गावांमध्ये ७ टँकर सुरू झाले होते. शुक्रवार (ता. १३) अखेर जिंतूर आणि पालम तालुक्यातील ५ लोकवस्त्यावर ८ टँकर सुरू होते. शुक्रवार (ता. २०)

अखेर जिंतूर तालुक्यातील शेवडी, वाघी धानोरा, धमधम येथे प्रत्येकी १, तर बोरो येथे ४ आणि पालम तालुक्यातील फुटतलाव तांडा येथे १ मिळून ८ टँकर सुरू असून, त्यांच्या १६ फेऱ्या मंजूर आहेत. शुक्रवार (ता. १३) पर्यंत नऊपैकी केवळ पाथरी तालुक्यात विहिरींचे अधिग्रहण केले नव्हते.

मागील आठवड्यात पाथरी तालुक्यातील जवळा झुटा येथील २ विहिरींचे अधिग्रहण करण्यात आले. त्यामुळे आता जिल्ह्यातील सर्व ९ तालुक्यांतील ५६ गावांतील ६६ विहिरींचे अधिग्रहण करण्यात आले आहे. त्यात जिंतूर आणि पालम तालुक्यातील ५ गावांतील ८ विहिरींचे टँकरसाठी तर परभणी, जिंतूर, सेलू, मानवत, पाथरी, सोनपेठ, गंगाखेड, पालम, पूर्णा तालुक्यातील ५१ गावांतील ५८ विहिरी टँकरव्यतिरिक्त आहेत.

५६ गावांतील ६६ विहिरींचे अधिग्रहण...

परभणी तालुका ः पेडगाव (एकूण १), जिंतूर तालुका ः सावंगी म्हाळसा, कोठा तांडा, धमधम, बोरी, इटोली, पोखर्णी तांडा, देवसडी, कोरवाडी, पिंपळगाव काजळे (एकूण १३), सेलू तालुका ः गिरगाव खुर्द, गिरगाव बुद्रुक, निरवाडी बुद्रुक, नागठाणा कुंभारी, कान्हड, केमापूर, रवळगाव, गव्हा (एकूण १०), मानवत तालुका ः रत्नापूर, मानवत रोड (एकूण २), पाथरी तालुका ः जवळा झुटा (एकुण २), सोनपेठ तालुका ः टिकू नाईक तांडा (एकूण १), गंगाखेड तालुका ः ईळेगाव, लिंबेवाडी, बोथी, वरवंटी थावरुनाईक तांडा, वरवंटी चंदूनाईक तांडा, कुंडगीरवाडी, काळीमाती तांडा, सज्जा घटांग्रा (एकूण ८), पालम तालुका ः बनवस, बोरगाव खुर्द, सादलापूर, रामापूर, मोजमाबाद, खरब धानोरा, उमरा, कोनेरवाडी, महादेववाडी, आजमाबाद, बोरगाव बुद्रुक, चाटोरी, पिराचा तांडा, पेमानाईक तांडा, पेंडु बुद्रुक, हनुमाननगर, रेवा नाईक तांडा, जोगलगाव, गणेशवाडी, सोनेरी तांडा, बेडकी तांडा, तावजी वाडी, फुटतलाव तांडा (एकूण २८), पूर्णा तालुकाः हिवरा बुद्रुक (एकूण १).