Akola News: नाशिक येथे रविवारी (ता. २०) झालेल्या कार्यक्रमात जानेफळ (ता. मेहकर) येथील विदर्भ समृद्धी कृषी कंपनीला (कै.) वसंतराव नाईक कृषी प्रेरणा पुरस्कार २०२५ देऊन सन्मानित करण्यात आले. 

माणुसकी फाउंडेशन (निफाड) आणि अॅग्रोकेअर कृषिमंच (नाशिक) यांच्या संयुक्त हा कार्यक्रम घेण्यात आला. हा पुरस्कार अन्न व नागरी पुरवठामंत्री  छगन भुजबळ यांच्या हस्ते पुरस्कार प्रदान करण्यात आला.

कंपनीने आपल्या कार्यक्षेत्रात हळद पिकाच्या उत्पादनापासून ते प्रक्रिया व विपणनापर्यंत उभारलेली नावीन्यपूर्ण मूल्य साखळी विशेष उल्लेखनीय ठरली.या अभिनव उपक्रमाची दखल घेत श्री. भुजबळ यांनी कंपनीच्या प्रयत्नांचे विशेष कौतुक केले.

हा पुरस्कार कंपनीचे अध्यक्ष संतोष साखरे, उपाध्यक्ष मोहन प्रल्हाद धोटे, सचिव अमोल माडोकर, कार्यकारी संचालक मोहन पाटील धोटे, संचालक गजानन काळे आणि व्यवस्थापक गणेश चांदणे यांनी स्वीकारला. पुरस्कार मिळाल्यामुळे या शेतकरी उत्पादक कंपनीच्या कार्याचे सर्वत्र कौतुक केले जात आहे.