Vardha : शेतकऱ्यांच्या आर्थिक सक्षमतेचे निमित्त ठरत असल्याने जिल्ह्यात रेशीम शेतीला प्रोत्साहन दिले जात आहे. याअंतर्गत शेतकऱ्यांना प्रशिक्षण, ‘केव्हीके’मध्ये तुती रोपवाटिका, रेअरींग युनिट व्हॉट्सअप ग्रुपच्या माध्यमातून रेशीम उत्पादकांच्या समस्यांचे निराकरण अशा बाबींवर भर देण्यात आला असल्याची माहिती जिल्हाधिकारी राहुल कर्डीले यांनी ॲग्रोवनशी बोलताना दिली.

महात्मा गांधी, विनोबा भावेंसारख्या विभूतींमुळे राज्यात वर्धा जिल्ह्याची वेगळी ओळख आहे. त्या पार्श्‍वभूमीवर शेती क्षेत्रातही या जिल्ह्याचे वेगळे अस्तित्व निर्माण व्हावे याकरिता प्रयत्न होत आहेत. त्याविषयी माहिती देताना श्री. कर्डीले म्हणाले, रेशीम शेतीतून अनेक शेतकऱ्यांनी आर्थिकस्थैर्य प्राप्त केले आहे. या शेतीला चालना मिळावी यासाठी केव्हीकेला तुती रोपवाटिका देत रेअरींग युनिट उभारले आहे.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

शेतकऱ्यांना मैसूर येथे प्रशिक्षणासाठी पाठविण्यात आले. या साऱ्याच्या परिणामी रेशीम शेतीसाठी नोंदणी करणाऱ्यांमध्ये नागपूर विभागात वर्धा जिल्हा आघाडीवर राहिला. शेतकऱ्यांना सातत्याने रेशीम शेती विषयक मार्गदर्शन मिळावे याकरिता रेशीम विकास वर्धा, तुती लागवड गाइड असे २३-२४ व्हॉट्सअप तयार केले आहे. त्यावर शेतकरी कोश विक्री केल्यानंतर शेतकरी पावत्या टाकतात. त्यातून इतरांना प्रोत्साहन मिळते.

मनरेगा अनुदानाच्या अडचणीही याच ठिकाणी सोडविल्या जातात. रेशीम कोष उत्पादन वाढल्यास रेशीम बाजाराचा पर्याय उपलब्ध करुन देण्यावरही भर राहील. रेशीम सोबतच जिल्ह्याची ओळख असलेल्या वायगाव हळदीच्या लागवडीलाही प्रोत्साहन दिले जात आहे. त्याला बाजारपेठ मिळावी याकरिता मुंबईत आयोजीत खरेदीदार विक्रेता संमेलनाला जिल्ह्यातील शेतकऱ्यांना पाठविण्यात आले. त्याचाही बऱ्याच अंशी फायदा झाला.