Sangli News : खरिपात प्रतिवर्षीप्रमाणे यंदाही युरिया खताची टंचाई सुरू झाली आहे. यावेळी विक्रेत्यांनी साठेबाजी केली जात असून युरिया खरेदीसाठी आलेल्यांना सक्तीने अन्य खते घ्यायला भाग पाडले जात आहे, अशा शेतकऱ्यांच्या तक्रारी आहेत.

जिल्ह्यातील सर्व तालुक्यांत युरियाची टंचाई भासत आहे. जिल्हाभरात कमी-अधिक प्रमाणात ही स्थिती असून ‘युरिया शिल्लक नाही’ असे फलक लावले आहेत. पावसाने जिल्हाभर समाधानकारक हजेरी लावल्याने पेरण्यांना लवकर सुरवात झाली. पाण्याची पुरेशी उपलब्धता असल्याने खरीप हंगामातील पेरण्या वेळेवर झाल्या.

मका, सोयाबीन, भुईमूग, कडधान्यांसह अन्य पिके सध्या वाढीच्या अवस्थेत असताना सध्या युरिया खतांची टंचाई जाणवत आहे. शेतकऱ्यांची कोंडी होत आहे. गावागावांतील खत दुकानदारांनी युरिया नसल्याचे सांगत हात वर केले आहेत. सुमारे ७ ते १० कंपन्या युरियाचा पुरवठा जिल्हाभरात करतात. मात्र प्रमुख विक्रेत्यांनी युरियाच नसल्याचे सांगितल्याने गावागावांतील खत विक्रेत्यांनी युरिया शिल्लक नसल्याचे फलक दुकानावर लावले आहेत.

यंदाही युरियासह डीएपी, सिंगल सुपर फॉस्फेट ही खतेही पुरेशी उपलब्ध नाहीत. खरीप हंगामपूर्व बैठकीत युरियासह अन्य खतांची मुबलक उपलब्धता असल्याचे सांगणारे कृषी विभागाचे अधिकारी टंचाईवेळी मूग गिळून गप्प बसतात. खतांचा काळाबाजार व कृत्रिम टंचाईकडे डोळेझाक करतात, अशी सर्वांची तक्रार आहे.

‘नॅनो’चा वापर अल्पच

हंगाम सुरू होताच यंदाही युरियाची मोठी समस्या समोर आली आहे. वाढीच्या काळात आवश्‍यक असलेला युरिया उपलब्ध नसल्याने शेतकरी अस्वस्थ आहेत. पेरणीच्या वेळेस युरिया देण्याची पद्धत वाढत असल्याने हंगामाच्या प्रारंभापासूनच युरियाला मागणी असते. नॅनो युरिया उपलब्ध असला, तरी त्याचा फारसा वापर सुरवातीला होत नाही. दाणेदार युरियालाच मागणी असते. त्यामुळे पंतप्रधानांच्या संकल्पनेतील ‘नॅनो’ युरियाला मागणी कमी असल्याचे चित्र आहे.