Pune News : चालू २०२४-२५ च्या हंगामात पहिल्या ७० दिवसांमध्ये देशातील साखर कारखान्यांकडे ११ हजार १४१ कोटी रुपये ‘एफआरपी’ देणी होती. त्यापैकी ऊस उत्पादकांना ८ कोटी १२६ कोटींची एफआरपी कारखान्यांनी दिली. कर्नाटकमध्ये सर्वाधिक १ हजार ४०५ कोटी रुपये थकित आहेत. त्यानंतर उत्तर प्रदेश आणि महाराष्ट्रात थकबाकी आहे, अशी माहीती केंद्रीय अन्नमंत्री प्रल्हाद जोशी यांनी संसदेत दिली.

देशात साखरेचा हंगाम ऑक्टोबर ते सप्टेंबर मानला जातो. उत्तर प्रदेश, महाराष्ट्र आणि तमिळनाडू या महत्त्वाच्या राज्यांमध्ये गाळप हंगाम जोमात सुरू आहे. गेल्या वर्षीच्या दुष्काळामुळे ऊस लागवडी अनेक भागांत काहीशा कमी होत्या, असी माहिती काही कारखानदारांनी दिली. तसेच यंदा पाऊस पुरेशा प्रमाणात असल्याने ऊस लागवडीसाठी पाणी उपलब्ध होते. त्यामुळे यंदा काही भागात लागवड वाढत आहे, असेही कारखानदारांनी सांगितले.

देशात उसाच्या एफआरपीवरून अनेदा वाद-विवाद, आंदोलने होत असतात. संसदेतही अनेदा हा प्रश्न गाजत असतो. बुधवारी (ता. १८) उसाच्या एफआरपीवरून सरकारला एक प्रश्न विचारण्यात आला होता. देशातील साखर कारखान्यांनी आतापर्यंत किती एफआरपी अदा केली, या प्रश्नाला केंद्रीय अन्नमंत्री प्रल्हाद जोशी यांनी लेखी उत्तर दिले.

केंद्रीय मंत्री प्रल्हाद जोशी आपल्या उत्तरात म्हणाले, की १३ डिसेंबरपर्यंत गाळप झालेल्या उसाची ११ हजार १४१ कोटी रुपयांची एफआरपी साखर कारखान्यांकडे देणी होती. त्यापैकी पहिल्या ७० दिवसांमध्ये शेतकऱ्यांना ८ हजार १२६ कोटी रुपयांची एफआरपी कारखान्यांनी दिली. आणखी ३ हजार १५ कोटी रुपयांची एफआरपी थकित आहे. थकित एफआरपीपैकी कर्नाटकात सर्वाधिक १ हजार ४०५ कोटी रुपये थकबाकी आहे. त्यानंतर उत्तर प्रदेश आणि महाराष्ट्रातील कारखान्यांकडे एफआरपी थकित आहे.

गेल्या हंगामातील स्थिती

२०२३ च्या ऊस गाळप हंगामात कारखान्यांकडे एकूण १ लाख ११ हजार ६७४ कोटी रुपयांची एफआरपी आली होती. त्यापैकी कारखान्यांनी शेतकऱ्यांना १ लाख १० हजार ३९९ कोटी रुपयांची एफआरपी दिली. म्हणजेच ९९ टक्के एफआरपी शेतकऱ्यांना अदा करण्यात आली. तर १ हजार २७५ कोटी रुपये अजूनही कारखान्यांकडे थकित आहेत, अशी माहितीही मंत्री जोशी यांनी दिली.