Akola News: राज्यात २०२३ मध्ये झालेल्या लघू टंकलेखक परीक्षेत पात्र ठरलेल्या उमेदवारांची व्यावसायिक चाचणी एक व दोन फेब्रुवारीला घेतली जाणार आहे. राज्यात आठ विभागांतील केंद्रांवर ही चाचणी परीक्षा एकाचवेळी होऊ घातली आहे. एकूण ६० पदांसाठी ३३४६ उमेदवारांची व्यावसायिक चाचणी होणार आहे.

कृषी विभागात कृषी आयुक्तालयाच्या अधिनस्त आस्थापनेवरील लघू टंकलेखक, लघू लेखक (निम्न श्रेणी), लघू लेखक (उच्च श्रेणी) या पदांकरिता ६ एप्रिल, २०२३ रोजी जाहिरात प्रसिद्ध झाली होती.

या जाहिरातीस अनुसरून पदांची ऑनलाइन परीक्षा ‘क’ २१ सप्टेंबर २०२३ रोजी झाली होती. परीक्षेचा निकाल प्रसिद्ध करण्यात आला आहे. या निकालानुसार पात्र ठरलेल्या उमेदवारांची व्यावसायिक चाचणी घेतली जात आहे. राज्यात आठ विभागांत नऊ केंद्रांवर व्यावसायिक चाचणी घेतली जाणार आहे.

या चाचणी परीक्षेसाठी पात्र ठरलेल्यांना प्रवेशपत्रे पाठविण्यात आली आहेत. ज्या उमेदवारांना प्रवेशपत्र मिळाले नसेल त्यांनी संबंधित विभागीय कृषी सहसंचालक कार्यालयामधून मंगळवारी (ता. २८) किंवा बुधवारी (ता. २९) प्राप्त करून घ्यावे, असे आवाहन कृषी आयुक्तालयाचे वरिष्ठ प्रशासकीय अधिकारी गजानन पाटील यांनी केले आहे.