ॲग्रोवन वृत्तसेवा
Akola News : अकोला ः यंदाच्या हंगामात लागवड असलेल्या तुरीच्या काही क्षेत्रात काढणीला प्रारंभ झाला आहे. प्रामुख्याने जूनच्या सुरुवातीला लागवड असलेल्या भागातील पिकाची काढणी झाली असून कुठे एकरी दोन क्विंटल, तर कुठे चार ते पाच क्विंटलपर्यंत सुद्धा उतारा आहे. मात्र, मध्यंतरी पडलेले धुके, वाळलेल्या पिकामुळे तुरीचे सरासरी उत्पादन यंदा तुलनेने कमी आहे. शिवाय मजुरांचीही टंचाई जाणवत आहे.

यावर्षात कमी प्रमाणात पाऊस झाला. त्याचा खरिपातील सर्वच पिकांवर झाला. याचा परिणाम तूर उत्पादनावरही झाला. अकोला, बुलडाणा, वाशीम या जिल्ह्यांमध्ये यंदा दुष्काळी परिस्थिती उद्भवलेली आहे. या जिल्ह्यामध्ये यंदा असमतोल हवामानाचा सर्वाधिक फटका बसला.

आधी मूग, उडीद हातातून गेले. त्यानंतर सोयाबीनचे पीकही बरेच कमी आले. आता तुरीच्या पिकाची काढणी सुरू झालेली आहे. तुरीची उत्पादकता एकरी क्विंटलपासून होत आहे. तुरीचे पीक सुरवातीच्या टप्प्यात चांगले होते.

पिकाची वाढही चांगली झाली. नंतर तूर फुलोऱ्यात असल्यापासून संकटे वाढू लागली. अनेक शेतातील तुरीची झाडे उधळली होती. शेंगा लागलेल्या असतानाही झाडे उभी वाळली. बऱ्याच शेतांमध्ये हे नुकसान ५० टक्क्यांपर्यंत होते. शिल्लक राहलेल्या तुरीची मळणी सुरू झाली.

तूर सोंगणीसाठी मजुरीचा दर एकरी २ ते ३ हजार रुपये मागितला जात आहे. उत्पादन कमी असतानाही दर अधिक झाल्याने बरेच शेतकरी हार्वेस्टरचा पर्याय अवलंबत आहेत. यंत्राने तूर काढणी केल्यामुळे जनावरांसाठी मिळणारे कुटार आता जमिनीतच गाळले जात आहे.

दरही ८००० पर्यंत
मध्यंतरी तुरीचा दरा १० हजारांवर पोचलेला होता. पिकाची काढणी जसजशी वाढू लागली तसा तुरीचा दर आता सरासरी ८ हजारांपर्यंत आलेला आहे. गेल्या काही दिवसांत दोन हजारांनी तुरीचा दर घसरलेला आहे.