Paddy Crop : भात पीक आले फुलोऱ्यात

Pune News : हिर्डोशी भागात (ता. भोर) भात पीक फुलोऱ्यात असून, लोंब्या लगडल्या आहेत. पुढील काही दिवसात भात पक्व होऊन भात पिके काढणी योग्य होणार आहेत. खोऱ्यात भात हेच प्रमुख पीक आहे. यंदा जून महिन्यात पावसाने हुलकावणी दिली. दुबार पेरणीचे संकट होते. परंतु जुलै महिन्यात झालेल्या पावसाच्या सुरुवातीने भात पीक लावणी योग्य झाली.

भात लावणीच्या काळातही पावसाच्या लहरीपणाने शेतकरी चिंतातूर होता. मात्र, तरीही भात लावण्या पूर्ण झाल्या. गणेशोत्सवाच्या काळात भात फुलावर‌ असताना जोरदार पाऊस झाला. त्यामुळे फुले झडून गेलेल्या पिकांचे उत्पादन घटणार आहे.

त्यातूनही उरलेल्या भात पिके फुलोऱ्यात असून भाताला‌ लोंब्या आल्या आहेत. अजून‌ काही ठिकाणी पीक हिरवेगार दिसत असली तरी काही ठिकाणी पिवळसर‌ पडू लागली आहेत. कर्णफुले पिवळी पडल्यानंतर भात पीक काढणीसाठी तयार होणार आहे.

रानटी प्राणी, पावसाचा लहरीपणा व करपा रोग यातून बचावलेली भात शेतीवर शेतकऱ्यांचे यंदाचे उत्पादन अवलंबून आहे.

दरम्यान, यंदा हंगामामध्ये कधी पावसाची दडी तर कधी मुसळधार असा लपंडाव सुरू होता. शेवटी कितीही केले तरी, काढणी होऊन भात घरात नेईपर्यंत शेतकऱ्यांचा जीव भांड्यात पडणार आहे.