Latur News : सोयाबीनला साडेआठ हजार रुपये प्रतिक्विंटल हमीभाव द्यावा, शेतकऱ्यांना सरसकट कर्जमाफी द्यावी आदी शेतकऱ्यांच्या विविध मागण्यांसाठी छावा संघटनेचे विजयकुमार घाडगे पाटील १८ सप्टेंबरपासून औशाच्या तहसील कार्यालयासमोर बेमुदत उपोषण सुरू केले आहे. त्यांच्या उपोषणाला पाठिंबा देत सोमवारी (ता. २३) तालुक्यातील शेतकऱ्यांनी ट्रॅक्टर फेरी काढली.

दरम्यान, दोन दिवसांपूर्वी शेतकऱ्यांनी सोयाबीनचा ढीग रचून सरकारच्या विरोधात घोषणाबाजी केली होती. याच विषयावर बुधवारी (ता. २५) रास्ता रोको आंदोलन करण्यात येणार आहे.

दरम्यान, घाडगे पाटील यांच्या आंदोलनाला शेतकरी व विविध संघटनांकडून मोठा पाठिंबा मिळत आहे. सोमवारी किल्ला मैदान ते तहसील कार्यालयादरम्यान काढलेल्या ट्रॅक्टर फेरीत शेकडो शेतकरी सहभागी झाले होते.

सकाळी आमदार अभिमन्यू पवार यांनी घाडगे यांची भेट घेऊन त्यांच्या मागण्यासंदर्भात मुख्यमंत्री, दोन्ही उपमुख्यमंत्री, कृषिमंत्री यांच्याशी चर्चा करण्याचा शब्द दिला. दोन दिवसांपूर्वी आमदार धीरज देशमुख यांनीही घाडगे यांची भेट घेऊन आंदोलनाला पाठिंबा देत सरकारच्या शेतकरीविरोधी धोरणावर टीका केली होती.

घाडगे यांच्या आंदोलनाला पाठिंबा देण्यासाठी माजी आमदार दिनकर माने यांनी बुधवारी सर्वपक्षीय रास्ता रोको आंदोलन करण्यात येणार असल्याचे सांगितले.