Chhatrapati Sambhajinagar News : सोयगावसह परिसरात शुक्रवारी (ता. २९) पहाटे साडेसहा वाजेच्या सुमारास अचानक अर्धा तास अवकाळी पावसाने हजेरी लावली. यामध्ये रब्बीची कापणी केलेली ज्वारी, बाजरी भिजली.

दरम्यान, गुरुवारी (ता. २८) रात्री अचानक वाढत्या उकाड्याने शहरासह ग्रामीण भागातील नागरिक हवालदिल झाले होते. रात्रभर अचानक उकाडा होऊन शुक्रवारी पहाटे साडेसहा वाजता पावसाने सोयगाव माळेगाव, पिंपरी, जरंडी, निंबायती, बहुलखेडा, कवली, उमर विहिरे, निमखेडा, घोसला आदी भागांत जोरदार अर्धा तास हजेरी लावली.

दरम्यान, नुकत्याच रब्बीच्या पिकांची कापणी केलेल्या बाजरी ज्वारीचे कणीस भिजली आहेत. तर उन्हाळी पिकांची फुलगळ झाली आहे. जरंडी, निंबायती भागात दोन ते तीन मिनिटे बारीक गारा पडल्याचे शेतकऱ्यांनी सांगितले. मात्र गारा पडल्याच्या प्रकरणी तालुका प्रशासनाने दुजोरा दिला नव्हता.

दरम्यान, शिवना (ता. सिल्लोड) परिसरात दोन दिवसांपासून असह्य उकाडा जाणवत होता. गुरुवारी (ता. २८) संध्याकाळी साडेपाचच्या सुमारास शिवना येथे पावसाने अर्धा तास जोरदार हजेरी लावली.

उकाड्याने हैराण झालेल्या नागरिकांना काहीसा दिलासा मिळाला. एकीकडे उकाडा अन् दुसरीकडे ऊन सावलीचा खेळ अस चित्र छत्रपती संभाजीनगर जिल्ह्यात शुक्रवारी दुपारपर्यंत बहुतांश भागात पाहायला मिळाली.