Ratnagiri News : अचानक बदललेल्या वातावरणामुळे हर्णे बंदरातील मासेमारीला अजूनही ब्रेकच आहे. त्यामुळे दररोजची सुमारे एक कोटीची उलाढाल थांबली आहे. त्याचा फटका स्थानिक मच्छीमारांना बसला असून मासे खरेदीसाठी येणाऱ्यांची निराशा होत आहे.

शासनाच्या नियमानुसार १ ऑगस्टपासून मासेमारीला सुरुवात झाली. पहिला महिना बंपर मासळी मिळत होती. परंतु दर ५० टक्क्यांनी घसरलेले होते. गणेशोत्सवामध्ये बहुसंख्य नौका किनाऱ्यावरच असतात. अनंत चतुर्दशीनंतर म्हणजेच २८ सप्टेंबरनंतर मासेमारीला सुरुवात होणे अपेक्षित होते. परंतु हवामान खात्याने वादळाचा इशारा दिल्यामुळे मच्छीमारांना बंदरात थांबावे लागले. शुक्रवारपासून (ता. २९) जोरदार पाऊस व वेगवान वारे वाहू लागले. त्यानंतर मंगळवारपर्यंत (ता. ३) वातावरण ‘जैसे थे’ आहे.

पुढील चार दिवस मच्छीमारांना शांतच बसावे लागणार असल्याचे पाजपंढरी येथील श्रीराम मच्छीमार सोसायटीचे संचालक व हेमंत चोगले यांनी सांगितले. हर्णे येथील बंदरावर दररोज मासळी विक्रीतून सुमारे एक कोटी रुपयांची उलाढाल होते. येथील मासा निर्यात होतो. वातावरणातील बदलाचा फटका मच्छीमारांना बसला आहे. सध्या येथील बंदरावर किनारी भागात पागून (हाताने जाळी टाकून) आणलेल्या माशांची विक्री होत आहे. त्याचे दर वधारलेले आहेत.