Manor News : दहिसर तर्फे मनोर ग्रामपंचायत हद्दीतील आदिवासीबहुल गुंदावे गावच्या ग्रामस्थांना मृतदेहाच्या अंत्यसंस्कारासाठी मोठी कसरत करावी लागत आहे.

गावाच्या दक्षिण दिशेला वांद्री धरणाच्या डाव्या कालव्यालगत असलेल्या एकमेव स्मशानभूमीकडे जाणारा रस्ता पाटबंधारे विभागाने खोदल्याने ग्रामस्थांची गैरसोय होत आहे. ग्रामस्थांची गैरसोय होत असल्याने स्मशानभूमीकडे जाणारा रस्ता पूर्ववत करण्याची मागणी ग्रामस्थांनी केली आहे.

वांद्री धरणाच्या डाव्या कालव्याला लागून गुंदावे गावची स्मशानभूमी आहे. स्मशानभूमी लगतच्या लघुपाटावरून स्मशानभूमीकडे जाणार रस्ता होता.

डावा तीर कालव्यातून गुंदावे गावाच्या दिशेने जाणाऱ्या लघुपाटाकडे जाणाऱ्या पाण्याचा प्रवाह लघुपाटातील सिमेंट पाईप गाळाने भरून गेल्याने बंद झाला होता.

सिमेंट पाईपमधून पाण्याचा प्रवाह बंद झाल्याने सिंचन हंगामासाठी डाव्या तीर कालव्यातून सोडलेले पाणी गुंदावे लघुपाटातून जात नसल्याने शेतकऱ्यांना दुबार भातशेतीसाठी पाणी उपलब्ध होत नसल्याने पाटबंधारे विभागाकडे तक्रार करण्यात आली होती.

पाटबंधारे विभागाच्या कर्मचाऱ्यांनी लघुपाटाची पाहणी केल्यानंतर गाळाने भरलेल्या पाईपमधील गाळ काढण्याऐवजी लघुपाट खोदून बाह्य वळण देऊन लघुपाटालगतच्या नाल्यातून पाणी वळवून पुढे पुन्हा लघुपाटात सोडण्यात आले होते.

पाण्याच्या प्रवाहातून वाट

वांद्री धरणाच्या डाव्या कालव्यावरील गुंदावे गावचा लघुपाट खोदल्याने स्मशानभूमीकडे जाणारा रस्ता बंद झाला आहे. स्मशानभूमीकडे जाण्यासाठी ग्रामस्थांना पाटाच्या पाण्याच्या प्रवाहातून वाट काढावी लागत आहे.

जानेवारी महिन्यात सुरू झालेल्या सिंचन हंगामाच्या सुरुवातीला लघुपाट खोदण्यात आल्याने गावातील मयत व्यक्तींच्या मृतदेहाच्या अंत्यसंस्कारासाठी मोठी कसरत करावी लागत असल्याने ग्रामस्थांची मोठी गैरसोय होत आहे.

रस्ता पूर्ववत करण्याची मागणी

गुंदावे येथील ग्रामस्थांना मृतदेहाच्या अंत्यसंस्कारासाठी लाकडे पाटाच्या पाण्यातून पलीकडे असलेल्या स्मशानभूमीत पोहचवावी लागत आहेत. मृतदेह पाण्याच्या प्रवाहातून स्मशानभूमीकडे नेण्यासाठी ग्रामस्थांना मोठी कसरत करावी लागत असल्याने ग्रामस्थांनी पाटबंधारे विभागाच्या कारभाराविरोधात संताप व्यक्त केला आहे.

यापुढेही कोणी मृत झाल्यास हिच परिस्थिती ओढावणार आहे. त्यामुळे गुंदावे गावच्या लघुपाटाचा गाळाने भरलेला पाईपमधील गाळ काढून मुख्य कालव्यातील पाणी लघुपाटातून सुरू करून स्मशानभूमीकडे जाणारा रस्ता पूर्ववत करून देण्याची मागणी ग्रामस्थांनी केली आहे.