Solapur News : महसूल नोंदी प्रलंबित ठेऊन मंडल अधिकारी व तलाठी लाखो रुपयांची लाच वसूल करतात, हे सिद्ध होऊनही या संदर्भात जिल्हाधिकारी कार्यालयाकडून ठोस कारवाई झाली नाही. ज्या उत्तर तहसील कार्यालयाबाबत सर्वात जास्त नोंदी प्रलंबित ठेवण्याचा प्रकार घडत आहे. त्याच तहसीलदारांकडे या प्रकरणाची चौकशी देण्यात आली आहे. यामुळे नोंदीत होणाऱ्या भ्रष्टाचाराला जिल्हाधिकारी कार्यालयातूनच आशीर्वाद मिळत आहे.

चालू महिन्यात उत्तर सोलापूर तहसील कार्यालयातील मंडल अधिकारी व तलाठ्याला तब्बल सहा लाखांची लाच घेताना रंगेहात पकडण्यात आले. संगणकीकृत उतारा बंद झाला तो सुरू करण्यासाठी ही लाच मागण्यात आली होती. तक्रारदाराने लाचलुचपत खात्याकडे तक्रार करण्याचे धारिष्ट दाखवल्यामुळे हे प्रकरण उघडकीस आले.

सोलापूर शहरात कार्यरत एका राजपात्रित अधिकाऱ्याच्या घरावरील कर्जाचा बोजा करण्यासाठी त्यांना गेल्या दोन वर्षांपासून उत्तर तहसील कार्यालयाचे उंबरठे झिजवावे लागत आहेत. याबाबत त्यांनी मंडल अधिकारी व तलाठ्याची तक्रार तहसीलदार कार्यालयात केली होती. यानंतरही या प्रकरणात कोणतीही कारवाई झाली नाही. यामुळे हताश झालेल्या अधिकाऱ्याने गेल्या वर्षी जिल्हाधिकारी कार्यालयात एक तक्रारी अर्ज दाखल केला.

सदर अधिकाऱ्याने दाखल केलेल्या तक्रारी अर्जाबाबत जिल्हाधिकारी कार्यालयाने कारवाई न करता हा अर्ज चौकशीसाठी डिसेंबर २३ मध्ये परत उत्तर तहसील कार्यालयाकडे पाठवला आहे. म्हणजे चोराच्या चोरीच्या चौकशीची जबाबदारी चोराकडेच असा प्रकार घडला आहे.

सर्वात जास्त प्रलंबित नोंदीची संख्या ही उत्तर तहसील कार्यालयात आहेत. गेल्या महिन्यातील उत्तरमधील तब्बल सहा लाख रुपयांच्या लाचखोरीच्या घटनेमुळे हा दावा खरा ठरत आहे. या प्रकरणात जोपर्यंत कठोर कारवाई होत नाही तोपर्यंत ही नागरिकांची लूट सुरू राहणार असे दिसत आहे. या अधिकाऱ्यांवर कारवाई व्हावी अशीच सामान्य नागरिकांची अपेक्षा आहे.