Amravati News : विदर्भातील सर्वच बाजार समित्यांमध्ये सोयाबीनचे दर दबावात आहेत. त्यामुळे सोयाबीन विकावे की तारण ठेवावे, अशा विवंचनेत शेतकरी अडकला आहे. सोयाबीनची साठेबाजी केल्यास एकाचवेळी ते बाजारात येऊन दर आणखी कोसळण्याची भीती आहे.

त्यामुळे अमरावती बाजार समितीत गेल्या आठवड्यापासून सोयाबीनची आवक चार हजार क्‍विंटलवरुन दुपटीने वाढत आठ हजार क्‍विंटलवर गेली आहे. अमरावती बाजार समितीच्या सूत्रांनी दिलेल्या माहितीनुसार, बाजारात सोयाबीनचे दर किमान ४ हजार ४५० तर कमाल ४ हजार ५६२ रुपयांवर स्थिरावले आहेत.

महिनाभरापासून याच दराने सोयाबीनचे व्यवहार होत आहेत. परिणामी येत्या काळातही या दरात सुधारणा होण्याची शक्‍यता नसल्याची स्थिती आहे. त्यामुळे दरवाढीच्या प्रतीक्षेत सुरवातीला सोयाबीन बाजारात न आणणाऱ्या शेतकऱ्यांनी आता मोठ्या प्रमाणात सोयाबीन बाजारात आणले आहे. त्यामुळे अमरावती बाजार सुरवातीला अवघ्या ४१०० क्‍विंटलची आवक होत असताना आता ही आवक ८ हजार ६३५ क्‍विंटलवर पोचली आहे.

येत्या काळात ही आवक आणखी वाढण्याची शक्‍यता आहे. सुमारे दहा हजार क्‍विंटलवर आवक पोचेल, असा दावा केला जात आहे. शेतकऱ्यांना कौटुंबिक गरजा भागविण्यासाठी पैशाची गरज आहे. त्यासाठी त्यांच्याकडून शेतीमाल विक्रीसाठी आणला जात आहे.