Nashik News : कांदा व द्राक्ष उत्पादक शेतकऱ्यांच्या निर्याती विषयक काही अडचणी आहेत. या सर्व अडचणी राज्यपातळीवरून केंद्रापर्यंत पोहोचविण्याचे काम शासन हाती घेणार असून, या माध्यमातून सकारात्मक मार्ग काढण्यात येईल, असे प्रतिपादन पालकमंत्री दादा भुसे यांनी व्यक्त केला.

शनिवारी (ता. १०) नाशिक येथील डोंगरे वसतिगृह मैदान येथे जिल्हा प्रशासन, जिल्हा परिषद, कृषी विभाग, आत्मा आणि महिला आर्थिक विकास महामंडळ यांच्यातर्फे नाशिक कृषी व नवतेजस्विनी महामहोत्सवाचे उद्‍घाटनमंत्री दादाजी भुसे यांच्या हस्ते झाले. या वेळी त्यांच्या हस्ते प्रगतिशील शेतकऱ्यांचा पुरस्कार देऊन सन्मान करण्यात आला.

या वेळी प्रकल्प संचालक (आत्मा) राजेंद्र निकम, जिल्हा अधीक्षक कृषी अधिकारी विवेक सोनवणे, महिला व बाल विकास विभागाचे उपायुक्त चंद्रशेखर पगारे, कृषी विकास अधिकारी कैलास शिरसाट, जिल्हा समन्वय अधिकारी संजय गायकवाड आदी अधिकारी व मान्यवर उपस्थित होते.

भुसे म्हणाले, की शेतकऱ्यांच्या सर्वांगीण विकासासाठी प्रधानमंत्री सम्मान निधी योजना ही केंद्र शासनाच्या माध्यमातून चालवली जात असून, केंद्र शासनाद्वारे ६ हजार व महाराष्ट्र शासनाद्वारे ‘नमो शेतकरी योजना’ राबविण्यात येत असून, या योजनेअंतर्गत सुद्धा वार्षिक ६ हजार रुपये शेतकऱ्यांना दिले जाणार आहे.

केंद्र व राज्य शासनाद्वारे एकूण १२ हजार रुपये शेतकऱ्यांना दिले जाणार आहेत. तसेच एक रुपयात पीकविमा देणारे देशात महाराष्ट्र एकमेव राज्य आहे. यंदा पाऊस कमी झाला असल्याने पाण्याची टंचाई निर्माण होणार आहे.

त्यामुळे जिल्ह्यातील पेयजलाचे व शेतीच्या पाण्याचे नियोजनाची कार्यवाही सुरू असून, प्रत्येकाला पुरेसे पाणी मिळावे यासाठी सूक्ष्म नियोजन केले जाईल. कार्यक्रमाचे प्रास्ताविक प्रकल्प संचालक (आत्मा) राजेंद्र निकम यांनी केले.

इगतपुरी येथे १० कोटी रुपयाचे कृषी भवन मंजूर

शेतकऱ्यांच्या सोईसाठी नुकतेच इगतपुरी येथे १० कोटी रुपयांचे कृषी भवन मंजूर झाले आहेत. तसेच मालेगाव येथे पाच कृषी महाविद्यालये मंजूर असून त्याचेही काम प्रगतीपथावर आहे. या कृषी महाविद्यालयाच्या माध्यमातून जिल्ह्याच्या शेतकऱ्यांना मार्गदर्शन केले जाणार असून त्याचे चांगले परिणाम येत्या काळात दिसून येतील,असा विश्वास भुसे यांनी व्यक्त केला.