Pune News: बारामती तालुक्यातील काटेवाडी येथे शुक्रवारी (ता. २७) जगद्‍गुरू संत तुकाराम महाराज यांच्या पालखी सोहळ्यातील मानाच्या मेंढ्यांचे रिंगण भक्तीच्या लहरींनी न्हाऊन निघाले. ‘‘राम कृष्ण हरी, ज्ञानोबा-तुकोबा’’ असा जयघोष करीत, वैष्णवांच्या अपार उत्साहात, मानाच्या मेंढ्या रिंगणात धावल्या. हा मनोहारी आणि भक्तिमय सोहळा अनुभवण्यासाठी लाखो भाविकांनी हरिनामाचा गजर करीत गर्दी केली.

पंढरीचा रंग रंगला जगीं ।

विठ्ठलाचे भक्त उभे रंगी ।।

हरिनामाचा गजर गर्जे ।

तुकोबांचे प्रेम हृदयी सजे ।।

या अभंगाप्रमाणे काटेवाडीच्या रिंगण सोहळा सजला होता. पंढरीच्या वारीत वारकऱ्यांचा उत्साह आणि हरिनामाचा गजर यातून विठ्ठल भेटीची ओढ रुजते. काटेवाडीत पार पडलेल्या मेंढ्यांच्या रिंगण सोहळ्यातील भक्तीच्या रंगात हा आनंद सामावलेला दिसला. आषाढी वारीच्या पवित्र प्रवासात, संत तुकाराम महाराज यांचा पालखी सोहळा टप्प्याटप्प्याने पंढरपूरकडे निघाला आहे.

बारामती येथील विश्रांतीनंतर पालखी काटेवाडीत भोजन आणि आरामासाठी थांबली. येथून सणसरकडे मार्गस्थ होताना मेंढ्यांचे रिंगण हा अनोखा सोहळा पार पडला. पालखी गावात पोहोचताच, ग्रामस्थांनी हरिनामाच्या जयघोषात भक्तिमय स्वागत केले. परंपरेनुसार, परीट समाजाने पालखीच्या मार्गावर धोतराच्या पायघड्या अंथरल्या, तर ग्रामस्थांनी वेशीपासून विश्रांती ठिकाणापर्यंत खांद्यावरून पालखी सन्मानाने नेली.

सणसरकडे मार्गस्थ होताना बस स्थानकावर मेंढ्यांचा अभूतपूर्व रिंगण सोहळा पार पडला. तात्यासो मासाळ, महादेव काळे, सुभाष मासाळ, जालिंदर महारनवर, उत्तम हाके, विकास केसकर, गुलाब महारनवर, पाटोळे आदींच्या मेंढ्यांनी पालखी भोवती पाच प्रदक्षिणा घालून रिंगण पूर्ण केले.