Construction Workers Kolhapur : राज्यातील बांधकाम कामगारांना दिवाळीसाठी पाच हजार रुपये सानुग्रह अनुदान (बोनस) देण्यात येणार होते. मात्र त्याबाबतचा कोणताही आदेश व परिपत्रक महाराष्ट्र इमारत व इतर बांधकाम कामगार कल्याणकारी मंडळातर्फे काढले गेले नाही. आचारसंहितेमुळे दिवाळीपूर्वी बोनस मिळेल, याची आशा धूसर झाली आहे. कोल्हापूर जिल्ह्यातील हातकणंगले व शिरोळ तालुक्यांतील १८ हजार कामगारांचा यामध्ये समावेश आहे.

याबाबत इचलकरंजी विभागाच्या सहाय्यक कामगार आयुक्त जानकी भोईटे यांनी दिलेल्या माहितीनुसार, इचलकरंजी सहायक कामगार आयुक्त कार्यालयास सानुग्रह अनुदानाबाबत कोणतेच आदेश प्राप्त झाले नाहीत. कार्यालयास आदेश प्राप्त झाल्यानंतर अनुदानाबाबत निर्णय घेण्यात येणार असल्याचे भोईटे यांनी सांगितलं.

इचलकरंजी सहायक कामगार आयुक्त कार्यालयामध्ये हातकणंगले व शिरोळ तालुक्यातील ५५ हजारहून अधिक बांधकाम कामगारांची नोंद आहे. यामधील जीवित नोंदी १८ हजार आहेत. ज्या बांधकाम कामगारांच्या नोंदी जीवित आहेत, त्यांना पाच हजार रुपये सानुग्रह अनुदानाची घोषणा केली होती. त्यानंतर बांधकाम कामगार, कामगार संघटना यांनी साखर पेढे वाटून आनंद उत्सव साजरा केला होता.

मात्र विधानसभा निवडणुकीच्या पार्श्वभूमीवर १५ ऑक्टोबरला निवडणूक आयोगाने आचारसंहिता घोषित केली. त्यामुळे कार्यालयीन प्रक्रियेस मर्यादा येत असल्याने बांधकाम कामगारांना सानुग्रह अनुदान दिवाळीपूर्वी मिळणार नसल्याचे निश्चित झाले.

२०१३ मध्ये बांधकाम कामगारांचे मंडळ स्थापन झाले. बांधकाम कामगार कल्याण मंडळाकडे कोट्यावधी रूपये शिल्लक असून त्यामधून कामगारांना दीपावली सानुग्रह अनुदान मिळावे, यासाठी २०२१ मध्ये कोर्टामध्ये कॅव्हेट दाखल केले होते. अनेक वर्षापासून संघटनांची मागणी होती की कामगारांना सानुग्रह अनुदान मिळावे. मात्र यंदाच्या दीपावलीमध्ये थोडीफार आर्थिक मदत मिळेल या आशेवर असलेल्या कामगारांच्या पदरी निराशा आल्याचे दिसून येत आहे.

कामगार नेते भरमा कांबळे म्हणाले की, सानुग्रह अनुदानाबाबत महाराष्ट्र राज्य इमारत व इतर बांधकाम कामगार कल्याणकारी मंडळाने परिपत्रक काढलेले नाही. काही एजंट ५ हजार रुपयांचे आमिष दाखवून फॉर्म भरण्याच्या नावाखाली पैसे गोळा करीत कामगारांची फसवणूक करीत आहेत, त्यास बळी पडू नये असल्याचे कांबळे यांनी सांगितलं.