Pune News : केंद्र सरकारकडून २०१६ मध्ये पीएम पीक विमा योजना सुरू करण्यात आली होती. या योजनेला आता ८ वर्ष होत असून यातून तब्बल २३ कोटी शेतकऱ्यांना आर्थिक सहाय्य करण्यात आले आहे. या योजनेअंतर्गत ८ वर्षात २३ कोटी शेतकऱ्यांना १.५५ लाख कोटी रुपयांचा थेट लाभ मिळाला आहे.

पंतप्रधान पीक विमा योजनेच्या लाभार्थ्यांची संख्या झपाट्याने ही वाढत आहे. या योजनेअंतर्गत, ८ वर्षांमध्ये २३ कोटींहून अधिक शेतकऱ्यांच्या खात्यात १.५५ लाख कोटी रुपये हस्तांतरित करण्यात आले आहेत. तर ही रक्कम शेतकऱ्यांना नुकसान भरपाईच्या स्वरूपात पीक विमा घेतल्यानंतर मिळालेली आहे.

याबाबत कृषी आणि शेतकरी कल्याण मंत्रालयाने माहिती दिली आहे. मंत्रालयाच्या मते, ८ वर्षात तब्बल ५६.८० कोटी शेतकऱ्यांनी पंतप्रधान पीक विमा योजनेतंर्गत अर्ज केले होते. यापैकी २३.२२ कोटीहून अधिक शेतकऱ्यांचे दावे प्राप्त झाले. तर पीक विमा योजनेतंर्गत शेतकऱ्यांनी प्रीमियमचा हिस्सा म्हणून अंदाजे ३१,१३९ कोटी रूपये भरले होते. यानंतर शेतकऱ्यांना १.५५.९७७ कोटी रुपयांचे वितरण करण्यात आले आहे.

पीएम पीक विमा योजनेची सुरूवात

देशातील सगळ्यात मोठी असणारी पीक विमा योजना ही जगातील देखील सगळ्यात मोठी योजना आहे. ही योजना २०१६ मध्ये केंद्र सरकारने सुरू केली. या योजनेंतर्गत, शेतकऱ्यांना पिकांचे नुकसान किंवा अनपेक्षित घटनांमुळे होणारे नुकसानीपासून संरक्षण दिले जाते. विशेषतः नैसर्गिक आपत्तीने होणाऱ्या नुकसानीसाठी आर्थिक सहाय्य दिले जाते.

लाभार्थ्यांची संख्या

पीएम पीक विमा योजनेतील व्याप्ती ही दरवर्षी वाढत आहे. या योजनेतंर्गत शेतकरी पीक विमा योजनेसाठी नोंदणी करत असून अर्ज दाखल करत आहेत. सरकारी आकडेवारीनुसार, २०२३-२४ मध्ये पीक विमा योजनेसाठी अर्ज करणाऱ्यांच्या संख्येत २७ टक्क्यांनी वाढ झाली आहे.