Pune News : भारतातील सर्वांत मोठे कृषी प्रदर्शन ‘किसान’ कृषी प्रदर्शनास बुधवारपासून (ता. ११) सुरुवात झाले आहे. प्रदर्शनाचे उद्‌घाटन बुधवारी सकाळी ९ वाजता प्रदर्शनस्थळी येणाऱ्या शेतकऱ्यांच्या पहिल्या गटाच्या हस्ते करण्यात आले. हे प्रदर्शन रविवारपर्यंत (ता.१५) पुणे आंतरराष्ट्रीय प्रदर्शन व संमेलन केंद्र, मोशी, भोसरीजवळ, पुणे येथे सुरू राहणार आहे.

यंदा किसान प्रदर्शनात संरक्षित शेती, पाणी नियोजन, कृषी निविष्ठा, यंत्रसामग्री, पशुधन, जैव, ऊर्जा, वाटिका व  शेती लघू उद्योग अशी विभागवार दालने उभी करण्यात आलेली आहेत. प्रत्येक दालनात त्या विशिष्ट विभागातील स्टॉल शेतकऱ्यांना पाहण्यासाठी उपलब्ध आहेत. शेतीसाठी लागणारी यंत्रे व उपकरणांचे प्रदर्शन खुल्या जागेत केले आहे.

प्रदर्शनातील सहभागासोबतच प्रदर्शक कंपन्या किसान अॅपवर त्यांच्या उत्पादनांची डिजिटल यादीदेखील प्रसिद्ध करू शकतात. शेतकरी घरबसल्या विविध उत्पादनांविषयी माहिती मिळवू शकतात आणि त्यांच्या मोबाईलवर संबंधित व्हिडिओ पाहू शकतात. या वर्षी किसानमध्ये ‘मातिमोल’ हा मातीच्या आरोग्याचे महत्त्व अधोरेखित करणारा उपक्रम साजरा केला जात आहे.

मातीच्या आरोग्याविषयी शेतकरी समुदायामध्ये जागरूकता वाढवणे हा उपक्रमाचा उद्देश आहे. ‘चला आपल्या मातीची स्थिती अधिक चांगल्या प्रकारे समजून घेऊया, अर्थात मातिमोल जाणूया,’ हा उपक्रम जैवतंत्रज्ञान विभाग आणि सावित्रीबाई फुले पुणे विद्यापीठाच्या संरेखित विभागांसोबत संयुक्तपणे आयोजित करण्यात येत आहे.

अॅपद्वारे नावनोंदणीची सोय

प्रदर्शनाच्या प्रवेशद्वारावर मोबाईल ॲपद्वारे आगाऊ नावनोंदणीची सोय केली आहे. तीस हजारांहून अधिक शेतकऱ्यांनी पूर्वनोंदणी केली असून, ही संख्या एक लाख संख्येने ओलांडण्याची अपेक्षा आहे.