Sangali News : क्रांतिअग्रणी डॉ. जी. डी. बापू लाड सहकारी साखर कारखान्याच्या (Dr. G. D. Bapu Lad Cooperative Sugar Factory) गाळप हंगामात ९ लाख ५६ हजार ३०० क्विंटल साखर पोत्यांचे उत्पादन झाले. कारखान्याच्या गाळप हंगामाची सांगता झाली.

हा गाळप हंगाम शेतकरी, तोडणी व वाहतूक कंत्राटदार, अधिकारी, कर्मचारी यांच्या सहकार्यामुळे यशस्वीपणे पार पडला असल्याचे मत आमदार अरुण लाड यांनी व्यक्त केले.

येथील कारखान्याच्या गाळप हंगाम सांगता कार्यक्रमावेळी साखर पोत्यांचे पूजन आणि काटा पूजन प्रसंगी आमदार लाड बोलत होते. या वेळी उपाध्यक्ष उमेश जोशी, कार्यकारी संचालक चंद्रकांत गव्हाणे प्रमुख उपस्थित होते.

आमदार लाड म्हणाले, की यंदा कारखान्याने ९ लाख ३० हजार १६६ टन ऊस गाळप केला आहे. साखर पोत्यांचे उत्पादन १४३ दिवसांत झाले आहे. यंदा निव्वळ साखर उतारा १०.३१ टक्के आहे.

परंतु, इथेनॉल निर्मितीसाठी सिरप व बी हेवी मोलॅसिसमध्ये वळवलेल्या साखरेचा विचार करता साखर उतारा सुमारे १२.६५ टक्के येत आहे. परंतु हा साखर उतारा वसंतदादा साखर संस्था पुणे यांच्याकडून प्रमाणित करून घेतल्यावरच जाहीर करता येईल.

कारखान्यांनी तयार केलेली वीज ही प्रदूषण विरहित असल्याने जुन्याच दराने ती शासनाने खरेदी केली पाहिजे.

या वेळी कारखान्याच्या क्रांती दूध संघाचे अध्यक्ष किरण लाड, जिल्हा परिषद सदस्य शरद लाड, नागेश पवार, मुकंद जोशी, संभाजी लाड, बबन निकम, वसंत लाड, जी. के. जाधव, ग्रामपंचायत सदस्य किरण लाड उपस्थित होते.