Solapur News:

अश्व धावे अश्वा मागे

वैष्णव उभे रिंगणी,

टाळ मृदंगा संगे

गेले रिंगण रंगूनी ॥

या पंक्तीप्रमाणे वैष्णवांची झालेली दाटी, टाळ-मृदंगाचा गजर आणि हरिनामाच्या गजरात संत शिरोमणी ज्ञानेश्वर महाराज पालखी सोहळ्यात पुरंदावडे (ता. माळशिरस) येथील रिंगण सोहळा मोठ्या उत्साहात पार पडला. मंगळवारी दुपारच्या न्याहरीनंतर पालखी सोहळा माळशिरस मुक्कामी विसावला.

नातेपुते येथील मुक्कामानंतर माउलींच्या पालखीचे पहिल्या गोल रिंगणासाठी पुरंदावडे येथे ज्ञानोबा माऊली तुकाराम अशा जयघोषात आगमन झाले. सकाळी नऊ वाजल्यापासूनच रिंगणात भाविकांनी गर्दी केली होती. त्यासाठी दुपारी अश्व पुरंदावडे येथील रिंगणात दाखल झाला. त्याचबरोबर रथापुढील दिंड्याही दाखल झाल्या.

या दिंडीमध्ये पुरुष व महिला वारकरी सहभागी झाले होते. ज्ञानोबा- तुकारामांचा जयघोष करीत दिंडीने उपस्थित लाखो भाविकांचे लक्ष वेधून घेतले होते. मंगळवारी दुपारी १२.३५ मिनिटांनी माउलींचा रथसोहळा पुरुंदावडे येथील रिंगण ठिकाणी पोहोचला. पालखीने एक फेरी मारली व पालखी मध्यभागी ठेवण्यात आली.

या वेळी पालखीची पूजा अर्जुनसिंह मोहिते पाटील, सरपंच राणी मोहिते, उपसरपंच देविदास ढोपे यांच्या हस्ते करण्यात आली. त्यानंतर टाळकरी, विणेकरी, तुळशी वृंदावनधारक महिला, झेंडेकरी या़ंच्यासह अश्वाच्या फेऱ्यासह गोल रिंगण झाले.