Kharip Season : यंदाच्या खरीप हंगामासाठी मराठवाड्यातील आठही जिल्ह्यांसाठी सुमारे १८ हजार २२७ कोटी ९९ लाख कर्ज पुरवठ्याचे उद्दिष्ट देण्यात आल्याची माहिती सूत्रांनी दिली. दरवर्षीच्या तुलनेत उद्दिष्टात वाढ केली नसती तरी अनेक प्रश्‍नांची उत्तरे मिळणे बाकी असताना मिळालेल्या कर्ज पुरवठ्याची उद्दिष्टपूर्ती करणे बँकांसमोर आव्हान असणार आहे.

कर्ज माफीचा कायम असलेला गुंता, मोठ्या प्रमाणात थकित असलेले कर्ज, सीबिल विषयाचा संभ्रम, मोठ्या प्रमाणात कर्ज प्रकरणात होत असलेल्या वन टाइम सेटलमेंट, राजकीय हस्तक्षेप यासह इतर अनेक अडचणी यंदाच्या कर्ज पुरवठ्याचे उद्दिष्टपूर्तीमध्ये असतील असे सूत्रांचे म्हणणे आहे. सुमारे १७ लाख ९५ हजार ७०८ खातेदारांना कर्ज पुरवठा होणे अपेक्षित आहे.

त्यामध्ये माहितीनुसार लातूरमध्ये ३ लाख १६ हजार ८०५ खातेदारांना नांदेडमध्ये २ लाख ८६ हजार २२४, बीडमध्ये २ लाख ३ हजार ४३५, छत्रपती संभाजीनगरमध्ये २ लाख ३० हजार १२, धाराशिवमधील १ लाख ६४ हजार ६७३, परभणीमधील २ लाख ३५ हजार ९५८, जालनामधील १ लाख ६३ हजार ३२ तर हिंगोली जिल्ह्यातील १ लाख ९५ हजार ५६९ खातेदारांना कर्ज पुरवठा होणे अपेक्षित असल्याची माहिती सूत्रांनी दिली.

जिल्हानिहाय उद्दिष्ट (कोटीत)

लातूर ३०९९.९८

नांदेड २५३२.९८

बीड २४०९.९८

छ.संभाजीनगर २४००

धाराशिव २२८०.०५

परभणी २२६०

जालना १८२०.०१

हिंगोली १४२४.९९