Khargar Water Issue : तळोजा वसाहतीमधील पाणी समस्या सोडविण्यासाठी उपाय करण्याऐवजी ‘पाणी प्रश्नासंदर्भात बैठकीची काय गरज आहे’, अशा प्रकारचे उत्तर सिडकोचे व्यवस्थापकीय संचालक विजय सिंघल यांनी दिले. त्यामुळे तळोजा फेडरेशनच्या वतीने सिडकोच्या नरिमन पॉइंट येथील कार्यालयावर आंदोलन केले जाणार असल्याचे पत्र फेडरेशनने मरीन ड्राइव्ह पोलिस ठाणे आणि सिडको मुख्यालयात दिले आहे.
तळोजा वसाहतीत गेल्या अनेक वर्षांपासून कमी दाबाने पाणीपुरवठा होत आहे. पाणीप्रश्नावर सिडको प्रशासनाचे लक्ष वेधण्यासाठी आतापर्यंत तळोजा फेडरेशनने सहा आंदोलने केली; मात्र आश्वासनापलीकडे काही मिळाले नाही. सिडकोने तळोजा वसाहत टँकरमुक्त व्हावे यासाठी दोन जलकुंभ बांधण्यात आले; परंतु पाणी समस्या दूर झाली नाही. या जलकुंभामध्ये किती एमएलडी साठा होतो आणि किती एमएलडी विसर्ग होते यासंदर्भात सिडकोकडून माहिती मिळाली नाही. त्यामुळे पाणी वाटपात मोठा भ्रष्टाचार आहे. ज्या इमारतींना कमी दाबाने पाणीपुरवठा होत आहे. त्या भागात नवीन जलवाहिनी टाकून पुरेसे पाणी उपलब्ध केले जाईल, असे आश्वासन देण्यात आले होते; परंतु अजूनही नवीन जलवाहिनीचे काम झालेले नाही.
तळोजा वसाहतीमधील सिडको जलकुंभावरून अवैधरित्या टँकर भरून पाणी विकले जात आहे. याची संपूर्ण कल्पना सिडको प्रशासनाला असूनसुद्धा दुर्लक्ष केले जात आहे. यासाठी फेडरेशनच्या पदाधिकाऱ्यांनी नुकताच सिडकोच्या मुंबई येथील नरिमन पॉइंट कार्यालयात व्यवस्थापकीय संचालक विजय सिंघल यांची भेट घेऊन पाणी समस्या बैठकीची मागणी केली असता, सिंघल यांनी प्रश्नासंदर्भात बैठकीची काय गरज आहे? असे उत्तर दिल्यामुळे १४ मे रोजी तळोजा फेडरेशनच्या वतीने नरिमन पॉइंट कार्यालयावर आंदोलन केले जाणार असल्याचे पत्र मरीन ड्राइव्ह पोलिस ठाणे आणि सिडको मुख्यालयात दिले आहे.
खारघर वसाहतीत गेल्या महिनाभरापासून अपुरा व अनियमित पाणीपुरवठा होत असल्यामुळे रहिवाशांना टँकरने पाणी विकत घेऊन गरजा पूर्ण कराव्या लागत आहेत. सिडकोने पूर्वीप्रमाणे खारघरवासीयांना पाणी उपलब्ध करून द्यावे, या मागणीचे निवेदन शिवसेना ठाकरे गटाच्या पदाधिकाऱ्यांनी सिडकोच्या पाणीपुरवठा विभागाच्या कार्यकारी अभियंत्यांना दिले. खारघर परिसरात गेल्या महिनाभरापासून कमी दाबाने पाणीपुरवठा होत असल्यामुळे रहिवाशांना टँकरने पाणी विकत घ्यावे लागत आहे.
तळोजावासीयांना पुरेसा पाणीपुरवठा व्हावा यासाठी सिडकोचे व्यवस्थापकीय संचालक विजय सिंघल यांची भेट घेऊन पाणी समस्येवर बैठक घ्यावी, अशी मागणी केली; मात्र त्यांनी बैठकीची गरज काय असे सांगून दुर्लक्ष केले आहे. पाणी मिळावे यासाठी सिडकोच्या मुंबई कार्यालयावर रहिवासी आंदोलन करणार आहेत.
- प्रसाद पाटील, पदाधिकारी, तळोजा फेडरेशन
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.