Hingoli News : पीकविमा योजनेचे अर्ज भरण्यासाठी आपले सरकार सेवा केंद्र व सीएससी सेंटरला शासन ठरावीक रक्कम देते. परंतु या केंद्रावर जास्तीची रक्कम घेत असल्याचे निदर्शनास आले आहे. त्यामुळे प्रत्येक सीएससी केंद्रावर तालुका कृषी अधिकारी यांचा संपर्क क्रमांकाचे सूचना फलक लावावेत.
पीकविमा अर्ज भरण्यासाठी पैसे मागितल्यास संबंधित तालुक्याच्या तालुका कृषी अधिकारी यांच्याकडे तक्रार करावी. याबाबत जनजागृती करावी, अशा सूचना जिल्हाधिकारी राहुल गुप्ता यांनी केल्या. जिल्हाधिकारी कार्यालयाच्या सभागृहात शुक्रवारी (ता. ४) राहुल गुप्ता यांच्या अध्यक्षेत कृषी विभागाच्या विविध योजनेची जिल्हास्तरीय आढावा बैठकीत ते बोलत होते.
या वेळी जिल्हा अधीक्षक कृषी अधिकारी राजेंद्र कदम, जिल्हा परिषदेचे कृषी विकास अधिकारी अतुल वायसे, उपविभागीय कृषी अधिकारी प्रदीप कच्छवे, सर्व तालुका कृषी अधिकारी, विमा प्रतिनिधी, विविध विभागांचे अधिकारी उपस्थित होते.
जिल्हाधिकारी गुप्ता म्हणाले, की जिल्ह्यातील होतकरू शेतकरी उत्पादक कंपनीच्या उत्पादनात वाढ करण्यासाठी व त्यांच्यामार्फत उत्पादित वस्तूंना बाजारपेठ उपलब्ध करुन देण्यासाठी व आवश्यक ती साधनसामग्री खरेदी करण्यासाठी बँकेमार्फत कर्ज उपलब्ध करून देण्यासाठी प्रयत्न करण्यात येईल. जिल्ह्यातील कृषी मालावर प्रक्रिया करुन जिल्ह्यातच विक्री करण्यासाठी जिल्ह्यात छोटे-उद्योजक तयार करावेत.
त्यासाठी त्यांना उत्पादन क्षमता व आवश्यक साधनसामग्री आणि उद्दिष्ट ठरवून द्यावेत. प्रधानमंत्री राष्ट्रीय कृषी विकास योजनेतून शेतकऱ्यांना पशुधन, शेतीपूरक उपकरणे, गांडूळ खतनिर्मिती यासारखे प्रकल्प राबवावेत. शेतकऱ्यांचे प्रात्यक्षिक व प्रशिक्षण देऊन सक्षम करावेत.आपल्या जिल्ह्याचे उत्पादन वाढवावे.
रेशीम उत्पादक शेतकऱ्यांची संख्या वाढविण्यासाठी जिल्ह्यातील एक हजार एकरवर तुती लागवडीचे नियोजन करावे. जिल्ह्यात तेलाचे उत्पादन वाढविण्यासाठी उद्योजकांना प्रोत्साहित करावेत. यासाठी शेतकऱ्यांना सोयाबीन,करडईचे सुधारित बियाणे उपलब्ध करुन द्यावेत.
जिल्हा तेलबिया अभियान समिती स्थापन करण्यास व आत्मा नियामक मंडळाने तयार केलेल्या जिल्हा कृती आराखड्यास मान्यता दिली. त्यांनी सुधारित प्रधानमंत्री पीक विमा योजना, खरीप पेरणी, गतवर्षीचा पीक विमा वाटप सद्यःस्थिती, प्रधानमंत्री किसान सन्मान निधी, ॲग्रीस्टॅक योजना, कडधान्य, पौष्टिक तृणधान्य, एकात्मिक फलोत्पादन विकास आदी योजनांचा आढावा घेतला.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.