Satara News: शेतकऱ्यांनी पिकविलेल्या कोणत्याही शेतीमालाला उत्पादन खर्चावर आधारित भाव मिळत नाही. कर्ज काढल्याशिवाय शेती करता येत नाही ही वस्तुस्थिती आहे. सरकार शेतकऱ्यांना लहान योजनांचे गाजर दाखवून फसवत आहे, असा आरोप बळीराजा शेतकरी संघटनेचे संस्थापक अध्यक्ष पंजाबराव पाटील यांनी केला.

प्रसिद्धिपत्रकात त्यांनी म्हटले आहे, की शेतकरी सरकारच्या फसव्या योजनांना फसत आहेत. साखर कारखानदार शेतकऱ्यांना चारी बाजूंनी लुबाडत आहेत. दूध व्यवसायामध्ये संकलन केंद्रापासून दूध संघ, दूध वितरण यामध्ये दुधाचे फॅट, वजन, दर यामधून दूध उत्पादक शेतकऱ्यांची लूट होत आहे.

सरकारने शेतकऱ्यांचे पूर्णपणे अवसान घेतले आहे. शेतकऱ्यावर सरकारने, व्यापाऱ्यांनी, उद्योगपतींनी, कारखानदारांनी कितीही अन्याय केला तरी शेतकरी सरकार दरबारी आवाज उठवत नाहीत याची खात्री सरकारला झाल्यामुळे सरकार शेतकऱ्यांच्या प्रश्‍नांकडे लक्ष देत नाही. सोयाबीनचा हंगाम संपून सहा महिने झाले तरीसुद्धा वाळवून ठेवलेल्या सोयाबीनला फॅट लावण्यात येत आहे.

बाजारात हमीभावापेक्षा पाचशे रुपये कमी भाव मिळत आहे. सरकारने निवडणुकीपूर्वी शेतकऱ्यांना शेती पंपाला मोफत वीज देणार असलयाचे जाहीर केले आहे. त्यावेळेस शेतकऱ्यांना आठ तास दिवसा, रात्री वीज मिळत होती. परंतु सत्ता आल्यानंतर शेती पंपाला फक्त चार तास वीज मिळत आहे.

येणाऱ्या काळात झोपलेल्या सरकारला जागे करून शेतकऱ्यांच्या प्रश्नावर आवाज उठवण्याचे काम करावे लागणार आहे. ते काम बळीराजा शेतकरी संघटना प्रामाणिकपणे करेल. शेतकऱ्यांना न्याय मिळवून देण्यासाठी रस्त्यावर उतरेल. पण शेतकऱ्यांनी बळीराजा संघटनेसमवेत रस्त्यावर उतरून आंदोलन करण्याची तयारी ठेवावी. शेतकऱ्यांनी दोन पावले पुढे येऊन संघर्षामध्ये सहभागी व्हावे, असे आवाहन श्री. पाटील यांनी केले.