Latest Agriculture News : निसर्गाच्या चक्रव्यूहात अडकलेल्या यंदाच्या खरीप हंगामातील पिकाच्या उत्पन्नात कमालीची घट झाली आहे. मूग, उडदाच्या मर्यादित उत्पन्नानंतर आता सुरू असलेल्या सोयाबीनच्या उत्पन्नात झालेली घट आणि त्यात पुन्हा घसरलेला दर शेतकऱ्यांच्या जिव्हारी लागला आहे.

उमरगा तालुक्यात कोरडवाहू क्षेत्र अधिक असल्याने खरीप हंगामातील पिकाच्या उत्पन्नावर शेतकऱ्यांची भिस्त असते. मात्र यंदा उशीरा पाऊस सुरू झाल्याने पेरण्याही उशीरा झाल्या. परिणामी पेरणीनंतर काही दिवस पिके चांगल्या स्थितीत होती.

पावसाने पुन्हा दडी मारल्याने पिके सुकू लागली. अधून - मधून झालेल्या हलक्या पावसामुळे पिकाच्या वाढीला थोडा आधार मिळाला होता, परंतु वेळ निघून गेल्याने फलधारणा, फळधारणा व्यवस्थित होऊ शकली नाही.

यंदा पाऊस लांबल्याने ६४ हजार ६८५ हेक्टर क्षेत्रावर सोयाबीनची पेरणी झालेली होती. तालुक्यात सर्वदूर पाऊस नसल्याने सोयाबीन पिकाची स्थिती वेगवेगळ्या ठिकाणी सारखी नाही. शेतकऱ्यांनी महागडे बियाणे, खतांसाठी आर्थिक पदरमोड केली.

सध्या आगोटी पेरणी क्षेत्रातील सोयाबिनच्या राशी सुरू आहेत. उत्पन्न बऱ्यापैकी निघत असले तरी अपेक्षित उत्पन्न मिळत नाही.