Amravati News : अमरावतीच्या बाजारात नव्या सोयाबीनची आवक सुरू होताच बाजारात तब्बल ५०० रुपयांची घसरण नोंदविण्यात आली आहे. मुळकूज, यलो मोझॅकसह हंगामात कीड, रोगांचा प्रादुर्भाव झाल्याने सोयाबीनची उत्पादकता प्रभावित झाली आहे. त्यानंतरही दर दबावात असल्याने शेतकरी हवालदील झाले आहेत.

यंदा खरीप हंगामाच्या सुरुवातीला मृग नक्षत्रात ज्या शेतकऱ्यांनी पेरणी केली होती. त्यांच्याकडील सोयाबीन आता बाजार समितीमध्ये विक्रीला येत आहे. त्यामुळे बाजारात सोयाबीनची आवक वाढताच दरात तब्बल ५०० रुपयांनी घट झाली आहे. शनिवारी (ता. २३) बाजार समितीमध्ये सोयाबीनची २१३४ पोत्यांची आवक झाली व ४६५० ते ४७४० रुपये भाव मिळाला आहे. महिनाभरापूर्वी सोयाबीनने पाच हजार रुपयांचा पल्ला गाठला होता. यंदा मॉन्सून एक महिना विलंबाने आला. परिणामी पेरण्यांनाही उशीर झाला. त्याचाही फटका उत्पादकतेला बसणार अशी शक्‍यता तज्ज्ञांनी आधीच वर्तविली होती. त्यानंतर जुलै महिन्यापासून मात्र पावसाने दाणादाण उडवून दिली. त्याच्या परिणामी अनेक शिवारात पाणी साचून राहिल्याने मुळकूजसह इतर अनेक कीड, रोगांचा प्रादुर्भाव शिवारात दिसून आला. अतिवृष्टीमुळे सोयाबीन बाधित झाल्याने वाढ खुंटली. परिणामी सोयाबीनच्या सरासरी उत्पादकतेत यंदा घट आली आहे.

असे आहे दर (प्रती क्‍विंटल रुपयांमध्ये)

९ सप्टेंबर ः ४७०० ते ४८७१

२० सप्टेंबर ः ४८०० ते ४९६०

२३ सप्टेंबर ः ४६५० ते ४७४०