Solapur News : सोलापूर जिल्हा मध्यवर्ती सहकारी बँकेच्या आर्थिक नुकसानीला जबाबदार असणाऱ्या तत्कालीन संचालक आणि अधिकारी, कर्मचाऱ्यांसह ३५ जणांवर ठपका ठेवत चौकशी समितीने त्यांच्याकडून २३८ कोटी ४३ लाख ९९९ रुपयांची वसुली निश्‍चिती केली. पण या प्रकरणी निर्णय होऊन २० दिवसांचा कालावधी उलटला, पण पुढील कोणतीच प्रक्रिया सुरू नसून, कामकाज मात्र ठप्प झाले आहे.

जिल्हा बँकेच्या या संपूर्ण प्रकरणाची निवृत्त अप्पर निबंधक डॉ. किशोर तोष्णीवाल यांनी चौकशी केली आहे. त्यांचा अहवाल त्यांनी ८ नोव्हेंबरला विभागीय सहनिबंधक योगीराज सुर्वे यांच्याकडे दिला आहे. त्यात तत्कालीन संचालकांसह काही अधिकारी-कर्मचाऱ्यासह स्पष्टपणे ३५ जणांवर ठपका ठेवला आहे.

तसेच त्यांच्याकडून २३८ कोटी ४३ लाख ९९९ रुपयांची वसुली काढली आहे. माजी उपमुख्यमंत्री विजयसिंह मोहिते पाटील, आमदार दिलीप सोपल, माजी आमदार बबनराव शिंदे, माजी आमदार संजय शिंदे, माजी आमदार राजन पाटील, दीपक साळुंखे, सिद्रामप्पा पाटील, जयवंतराव जगताप आदी दिग्गज नेत्यांचा त्यात समावेश आहे.

आता या वसुलीसाठी खास वसुली अधिकारयांची नियुक्ती होणार आहे. पण त्यासाठी आवश्यक असणारे वसुलीचे दाखले काढण्याची प्रक्रिया आहे. पण आज २० दिवसांनंतरही याबाबतची कोणतीच प्रक्रिया सुरू झालेली नाही. विधानसभा निवडणुकीमुळे ही प्रक्रिया थांबली असल्याचे सांगितले जाते. पण त्यानंतरही याबाबत कारवाईसाठी अद्याप काहीच हालचाली नाहीत.

 सहकारमंत्र्यांकडे अपिलाची संधी

या प्रकरणातील ठपका असणारे संचालक आणि अधिकाऱ्यांना त्यांचे म्हणणे मांडण्यासाठी ९० दिवसांचा कालावधी दिलेला आहे. तसेच नव्या मंत्रिमंडळातील सहकारमंत्र्यांकडे या संचालक आणि अधिकाऱ्यांना यासंबंधी अपील करण्याची संधी आहे, पण कोणाकडे हे मंत्रिपद जाणार आणि पुढे ते काय निर्णय घेणार, हे पाहणेही महत्त्वाचे आहे.