Pune News : राष्ट्रवादी काँग्रेस शरदचंद्र पवार पक्षाचे अध्यक्ष खासदार शरद पवार यांनी दिल्लीत पंतप्रधान नरेंद्र मोदी यांची आज (ता.१८) भेट घेतली. यामुळे राजकारणात एकच खळबळ उडाली आहे. शरद पवार यांनी शेती, शेतकरी प्रश्नांसह साहित्य परिषदेच्या निमंत्रणासाठी मोदी यांची भेट घेतली आहे.
दिल्लीत संसदेचे हिवाळी अधिवेशन सुरू असून विविध मुद्द्यांवर सत्ताधारी आणि विरोधकांच्यात फैरी झडत आहेत. विरोधक शेतीच्या प्रश्नासह शेतकरी आंदोलनावर संसदेबाहेर आंदोलन करत असून संसदेत देखील प्रश्न उपस्थित करत आहेत. तर शेतकरी नेते देखील मोदी सरकारवर टीका करताना दिसत आहे.
दरम्यान जेष्ठ नेते शरद पवार यांनी पंतप्रधान मोदींची संसद भवनात आज भेट घेतली. ही भेट साहित्य परिषदेच्या निमंत्रण देण्यासाठी घेतली. यावेळी त्यांनी डाळिंब शेतीच्या संदर्भात निर्माण झालेल्या प्रश्नासह शेतकरी आंदोलनाशी संबंधित मुद्द्यांवर चर्चा केली. यावेळी सातारा आणि फलटन येथील दोन शेतकरी उपस्थित होते. यावेळी शरद पवार यांनी राजकीय चर्चा टाळली. तसेच मोदींना राज्यातील डाळिंब भेट दिली.
शरद पवार यांनी, हमीभाव गॅरंटी आणि इतर अनेक मागण्यांसह दिल्लीच्या सीमेवर सुरू असणाऱ्या शेतकरी आंदोलनावर चर्चा केली. याआधी पंतप्रधान मोदी आणि शरद पवार यांची भेट पुण्यात झाली होती. त्यावेळी एका कार्यक्रमात मोदी आणि शरद पवार एकाच मंचावर आले होते. यानंतर आता पंतप्रधान मोदी आणि शरद पवार पुन्हा एकदा एका मंचावर येतात का हे पाहावं लागणार आहे.
याच महिन्यात गेल्याच आठवड्यात शरद पवार यांचा वाढदिवस झाला. यावेळी पक्ष फुटीनंतर अजित पवार यांनी आपल्या परिवारासह आणि पक्षातील वरिष्ठ नेत्यांसह दिल्लीत त्यांची भेट घेतली होती. या भेटीवेळी खासदार सुप्रीया सुळे यांच्यासह शरद पवार यांच्या गटातील अनेक नेते उपस्थित होते.
या भेटीनंतर राज्याच्या राजकारणात नवी समिकरणं उदयास येतील असा कयास बांधला जात होता. पण ती भेट फक्त कौटुंबिक होती असे स्पष्टीकरण अजित पवार यांनी दिले होते. यानंतर आता शरद पवार यांनी पंतप्रधान नरेंद्र मोदी यांची भेट घेतली आहे. यामुळे नव्या राजकीय चर्चांना उधान आले आहे.
एकीकडे शरद पवार पंतप्रधान नरेंद्र मोदी यांची दिल्लीत भेट घेत होते. त्याचवेळी दुसरीकडे राज्याच्या हिवाळी अधिवेशनाच्या तिसऱ्या दिवशी नागपुरमध्ये विरोधकांनी आंदोलन केले. विरोधकांनी शेती प्रश्नावर आक्रमक पवित्रा घेत सोयाबीन, कापूस, तूर, धान या शेतीमालाला योग्य भाव मिळाला पाहिजे, अशी जोरदार मागणी केली. विरोधकांनी विधिमंडळाच्या पायऱ्यावर गळ्यात कापसाचे बोंडाच्या माळा घालून आंदोलन केले.
दरम्यान आज पंजाबमध्ये शेतकरी नेते राकेश टिकैत यांच्या नेतृत्वात शेतकरी नेते जगजित सिंग डल्लेवाल यांच्या आमरण उपोषणाच्या समर्थनार्थ ट्रॅक्टर मोर्चा आणि रेल्वे रोको केला जाणार आहे. पंजाबच्या विविध ठिकाणी ट्रॅक्टर मोर्चा काढण्यात येणार असून दुपारी १२ ते ३ या वेळेत रेल्वे रोको आंदोलन करण्यात येणार आहे
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.